Shillong, Ïaïong 09
Ka Atletico Madrid ka la nangjan ban jam sha ka semi final ha ka Champions League hadien ba ka la pynliem noh ïa ka Barcelona da 2-0 kol ha ka quarter final ka wat kaba nyngkong ha ka sngi Palei ha Camp Nou.
Kane ka la wan urlong lyngba u Julian Alvarez bad u Alexander Sorloth, ha ryngkat ka jingïoh red card ka Barcelona, kaba la long ka jingkyrmen na ka bynta ka kynhun u Diego Simeone ba kan lah ïalehkai bha sa ha ka wat kaba ar.
Ka Barcelona kaba danglam-khmat ha ka lympung La Liga, ka la shem jingeh ban ioh thep kol pyrshah ïa katei ka kynhun kaba na Spain. Hynrei shwa ban kut ka kylla step kane ka kynhun ka la hap ban ïalehkai sa tang shiphew ngut ki rangïalehkai na ka daw ba u Pau Cubarsi u la shah sei da ka red card hadien ba u la pynur ïa u Giuliano Simeone, uba dangpyrshang ban thep kol. Ha ka jingshisha na ka liang u rephri u la sei da ka yellow card, hynrei lyngba ka jingbishar bniah da ka VAR u la hap ban mih noh shi syndon na madan.
Te kumta ka Atletico ka la ïoh ban pynkhih jar lyngba u Alvarez ha ka free-kick na ka bynta ban tam shi kol ha ka kylla step.
Hadien ba la bteng biang ïa ka kylla miet, ka Barcelona ka la pyrshang ban ïakhun tyngeh na ka bynta ban pynphai kylla. U Marcus Rashford uba la ïoh ïa ka kabu kaba biang, um shym la lah ban pynurlong na ka daw ka jingïashan tyngeh ki rangïalehkai ‘dien ka Atletico lem bad u rangapkol u Juan Musso.
Hadien katto katne por ka Atletico ka la ïoh ban thep biang sa shi kol lyngba u Sorloth na ka bynta ban pynlong ïa katei ka kynhun ban tam da 2-0 kol bad haduh kaba kut ka la khur syndon ïa ka jingjop.
Ha kawei pat ka jingïakhun ka Paris Saint-Germain ka la jop da 2-0 kol ïa ka Liverpool bad ka la nangjam ban jam sha ka semi final jong kane ka lympung. Kane ka la wan lyngba ki kol ba la thep da u Desire Doue bad u Khvicha Kvaratskhelia.
Te kumta ka PSG ka donkam ban ïalehkai bha ha ka wat kaba ar shabar na la ïing khnang ban pynurlong ïa ka jingngnud.
Ha kiwei pat ki jingïakhun quarter final (1st leg) kiba la long ha ka sngi Balang, ka Bayern Munich ka la pynliem noh ïa ka Real Madrid da 2-1 kol bad ka Arsenal ka la jop da 1-0 kol ïa ka Sporting.
