Shillong, Ïaïong 09
Ka Nongkseh Sports Social and Cultural Club (SS&CC) ka la pyllait ïa ki sopti ïalehkai ne ki jersey jong ka, na ka bynta ka samoi ïalehkai 2026, ha ka 7 tarik ha Nongkseh Indoor Stadium.
Kane ka jingpyllait jersey ka long hashwa ba kane ka lahduh jong ka Champions Cup 2025, kan pynkhreh ban shim bynta ha ka Meghalaya State League (MSL) ka ban sdang mynta u bnai bad ruh ha ka Shillong Premier League (SPL) ka ban sa sdang kham hadien hadien ba la kiew kyrdan sha kane ka lympung.
Kine ki jersey ki kynthup ïa ki jingïalehkai haïing bad habar (home and away) lem bad kawei na ka bynta ka jingpynkhreh lypa kaba dei ka rong ïong bad ksiar kaba long shi bynta jong ka jingjop kaba khlem shah rem kane ka kynhun ha ka aïom ba la lah.
Ha kane ka prokram la ïadon lang u Rangbah shnong ka Raid Sawkur Nongkseh, u Bah Myrank Thangkhiew, u President jong ka klob u Bah Daniel M. Thangkhiew, ki rangïa -lehkai ryngkat kiwei pat ki riew rangbah na ka Synjuk Bhalang Kynthei Raid Sawkur Nongkseh, ki VDP bad ki paidbah nongshong shnong ka Nongkseh.
Hadien ba ka kiew kyrdan sha ka SPL, kane ka klob ka la pynkhlaiñ ïa ka kynhun da kaba ka la wanrah katto katne ki rangïalehkai kiba thymmai.
Napdeng kine kiba ka la dep ban soi, u Sheen Stevenson Sohktung, u la long uwei na ki rangïa-lehkai uba kum ka klob ka phaikhmat. Une u rangïa-lehkai barim ka Shillong Lajong FC, u la long uba kynsai uba la lah ban thep kol ha ki aïom ba la lah.
Ha ka bynta kaba shadien, ka klob ka la wanrah ïa u Aibiang Mame Nong-neng na ka Kickstart FC bad u Banraplang Pyng-rope na ka Mawlai SC. Katba ha ka liang ki nong-apkol, u Babitlang Wah-lang u la ïasoh sha kane ka kynhun na ka Langsning FC na ka bynta ban kyrshan ïa ka kynhun ha kane ka aïom ka ban wan.
