Shillong, Ïaïong 09
Ka skul Albera Higher Secondary School, Mawnianglah ka long kawei ka skul kaba ai jingshakri ïa ki nongkyndong bad kumjuh sha khapsor kaba la kiew bha watla kadei ka skul kaba kyrshan dalade ïalade.
Ha ka result SSLC ba la pynmih ha ka 7 tarik Ïaïong 2026 ha kane ka skul la don uwei u samla uba tip kyrteng u Kwinas Joes Diengdoh uba duna satang shi mark ban poi sha ka thup Top 20. Nangta baroh ki khynnah kiba ïakhun ïa kane ka exam na kane ka skul ki la pass lut.
Ïa kane ka skul la ainam ha u Rev. Fr. Virgil Albera. U Mishonari bakhraw na ri Italy. Palat lai pawa ka jingim jong u, u la pynlut ha Ri Khasi bad Jaiñtia. U la trei borbah ha Raliang – Mawkyndeng, u la trei ha Don Bosco. U la seng ïa ka St. Paul’s Seminary, Laimer bad u la trei palat 14 snem ha St. Paul Parish Upper Shillong haduh ba un da khlad ha u bnai Nailar 1987. Ha ka nam jong u la pynïeng ïa ka Albera School ha Mawnianglah. La sdang ïa kane ka skul da u Rev. Fr. Henry Manar. Kane kadei ka skul ba la ïoh jingithuh na ka Sorkar.
Ïa ki nonghikai pat la kyrshan tang da ki bai skul (fees) jong ki khynnah. Ki jingsiew ruh ki long kiba rit. Ki babun ki kmie ki kpa ki dei ki nongbylla bad nongrep.
Kane ka Skul ka la nangroi shuh shuh, ynda ka la hap pat mynta ha ka jingsumar jong ka Parish Mawnianglah. Hapoh 2 snem, ka skul Albera ka la phuh la phieng da shisha. Ki khynnah skul bad ki nonghikai ki la ïoh ïa ka jingpynshlur ha baroh ki liang.
U Babu Christopher Nongtdu ha ka jingpyntip u la ong ba la dei ban ïaroh tyngeh ïa i Principal bad ki nonghikai baieid kiba trei shitom da shisha. Ka Skul ka la nangkiew ha ki liang baroh.
