Shillong, Ïaïong 09
U Myntri ka tnad Public Health Engineering (PHE) u Marcuise N Marak ha ka sngi Palei u la pyntip ba ïa ka Greater Shillong Water Supply Scheme (GSWSS)-III la jan dep artad bad ka um ka la poi mynta ha ki jaka pynkhuid um.
“Ka jingpynpoi um na ka phase-III na dam ka la dep bad dang shen la dep pyrshang ruh ban pyntreikam bad ka long ruh kaba jop bad ka um ka la poi ha ka jaka pynkhuid um” ong u Marcuise haba kren sha ki nongthoh khubor bad bynrap ba ki kam ba dang sahteng ki dei tang haba ïadei ka jingsam um bad ka jingpynbeit ryntih ïa ki pipe um.
U Myntri u la pynpaw ïa ka jingkyrmen ba ka projek kan sa dep noh shen bad ai ka jingïaroh ïa ki nongshong shnong ka thaiñ kiba la ai ka jingïatreilang.
Ha kaba ïadei ka jingshna ïa ka dam na ka bynta ka New Shillong Water Supply Scheme u Myntri u la pyntip ba yn pyndep hapoh jong u snem ban wan bad pyntip ba ïa kane u Myntri u la leit ban jurip dalade ïa ka jingpyntrei bad kyrmen ban lah ban pyndep ïa ka jingshna ïa ka dam hapoh jong u snem 2027.
“Nga la leit ban peit da la ki khmat ïa ka dam, ka jingpyntrei ka ïaid baroh 24 kynta shisngi bad nga kyrmen ban pyndep noh ïa ka dam hapoh u snem ban wan” u la ong.
U Myntri u la pynpaw ba ka kam thied jaka ka dei kaba pynslem ïa ka projek hynrei baroh kine kiei-kiei, la dep ban pynbeit mynta, kaba ailad ïa ka jingpyntrei ïa ki kam ba kin ïaid shaid-shaid.
Haba ïadei ka Tura Water Supply Scheme, u Marcuise u la ïathuh ba ka jingpyrshah ban shna ïa ka dam baroh shi katta ka dei ka kam kaba la dep ban ïa pynbeit mynta bad shen ka jingpyntrei ïa ka dam kan sa sdang noh.
