Shillong, Ïaïong 09
Ka lympung ïalehkai 31st District Level Inter School Athletic Meet 2026 ban pynlong da ka shlem treikam jong ka District Sports Officer (DSO) West Khasi Hills kan sdang ha ka 22 haduh 24 tarik mynta u bnai ha madan Nongpathar kaba ha Pyndengrei, Nongstoiñ.
Ha kane ka lympung yn phiah ïa ki lai tylli ki kyrdan ïalehkai kata ka Under-14, Under-16 bad ka Under-18 jong ki kynthei bad shynrang.
Ki jingïalehkai ha kane ka lympung ïalehkai ka ban neh lai sngi kynthih kin kynthup ïa Triathlon, kumjuh ki jingïakop mareh bapher bapher naduh ka 60m, 100m, 200m, 300m, 400m, 1000m, 5000m, High Jump, Long jump, Shotput, Discuss Throw, Javelin Throw, 4×100 m Relay, 4x400m Relay bad kiwei kiwei.
Te kumta ka jingkhmih bniah ïa ki rta ki khynnah ïalehkai kan long ha ka 14 bad 15 tarik mynta u bnai ha Indoor Stadium, Nongstoiñ.
Kumjuh ïa ka 5th District Level Inter School Athletic Meet 2026 na ka bynta ka Eastern West Khasi Hills yn pynlong naduh 29 tarik mynta u bnai haduh 1 tarik u Jymmang ha madan jong ka KSA kaba ha Mairang.
La ong ba ka jingkhmih bniah na ka bynta ki rta jong ki khynnah ïalehkai kan long ha ka 16 tarik mynta u bnai ha madan KSA naduh ka por 9 baje shaneng.
Kumjuh ha East Khasi Hills District yn pynlong ïa ka Inter School Athletic Meet 2026 naduh 6 haduh 8 tarik u Jymmang ha SAI Training Centre kaba ha NEHU.
Ka jingkhmih bniah ïa ki rta jong ki nongshim bynta kan long ha ka 23 tarik mynta u bnai naduh 10 baje shaneng ha JN Stadium, Polo.
