Shillong, Ïaïong 09
Ki Khasi kiba shong ba sah ha Assam ki la ïoh ban shimbynta lang ban thep vote ha ka ilekshon ban jied ïa ki nongmihkhmat sha ka ïingdorbar thawaiñ ka jylla Assam kaba la long ha ka sngi Palei.
Kumjuh ruh ki don ki Khasi kiba shong ba sah ha khappud Meghalaya bad Assam kiba don EPIC baroh ar tylli ki Jylla ki la ïoh ruh ban rai lang ban thep vote ha ka ilekshon MLA ha Assam.
Ka jingñiew vote kan long ha ka 4 tarik u bnai Jymmang, 2026.
Haba ïoh ban ïakren bad u Bah Pynshngain Rattane uba dei u President ka United Khasi Peoples Organisation u la ïathuh ba ki Khasi kiba shong ba sah ha West Karbi Anglong bad hap hapoh ka Amri Constituency ki don kumba khyndai hajar ngut kiba ïoh ban jied ïa u nongmihkhmat sha ka ïingdorbar thawaiñ.
U la ïathuh ba ha Amri Constituency ki don lai ngut ki kyrtong kiba ïakhun kata u kyrtong ka BJP u Habbey Teron, ki kyrtong shimet u Bikran Hanse bad u Wilson Terang.
U la ïathuh ba katkum ka jingpeit jong u ha kane ka Constituency u kyrtong ka BJP u lah ban ïoh jingjop namar ki rit paid kum ki Khasi ki dang shaniah ïa ka BJP kaba ïalam ha Delhi bad ha Assam.
Shuh shuh u la ïathuh ba ka jingsngewjan ki Khasi ïa ka BJP ka dei namar ka la ïarap shibun kaba ki Khasi ki donkam haba ki sah ha West Karbi Anglong.
U la ïathuh ba ki Khasi kiba sah ha khappud kiba don ar tylli ki EPIC ha Meghalaya bad Assam ki la shimbynta lang ban jied ïa u MLA ha Assam.
U la pynpaw ka jingsngewkmen namar ha kane ka ilekshon ka long kaba ïaid beit ïaid ryntih namar kam don kano-kano ka jinghuri hura.
U la pyntip ba ki Khasi kiba sah ha kylleng ki district ha Assam ki la ïoh ban shimbynta ban jied ïa ki nongmihkhmat ryngkat ka jingbuh ïa ki jingdawa khnang ba lada ki kyrtong ki jop kin ai jingmyntoi ïa ki Khasi.
