Kano kano ka jait niam kam lah bad kam donbor ban pyllait ïa ngi na ka pop. Dei tang ka bor u Blei kaba lah ban pyllait na ka pop bad ki jingsniew ba har rukom. Ka pop ka long ka jinglong bym khuid ha ka dohnud. Ka niam hi kam lah ban pyllait ïa ngi na ka pop ne ka jing-iap. Ka pop ka long ba ngim ngeit ïa ka jingshisha kaba wan na U Blei,
Ngi bud bad ngi ngeit pynban ïa ki jinghikai niam kane ka pyrthei. Ka pop ka long ka kam sniew kam smeh, ka bishni ka pihuiñ para briew. Haba ngi ïeng sakhi lamler ïa ki para briew ka long ka pop kaba khraw, bad ka jingkren beiñ kren khoh ïa ki bym don iktiar ka long ka pop.
Nangta ka kren beiñ Blei ruh ka long ka pop kaba khraw tam eh. Ki kam awria bad ka kam klim ruh ki long ka pop. Ka kam pyniap briew bad ka kam tuh ruh ki long ka pop.
Ka ktien u Blei ruh ka ong, ym don uba hok em, ym don uwei ruh. Namar baroh ki la leh pop ki la duh leh nohei ïa ka burom ka jong u Blei. Kiba kren beiñ kren khoh ïa ka kmie bad u kpa ruh ki long ka dak jong ka pop.
Namar ba ngim lah ban bud ïa ki hukum jong u Blei, kumta ngi hap ha ka sni jong ka jingïap ne ka pop. Namar ka bainong ka pop ka long ka jingïap (Nong Rom 6 : 23). Ngi long niam ban lait na ka pop hynrei em, ngim ym lait na ka pop watla ngi shakri niam baroh 365 sngi shisnem ruh. Kane ka dei ka jingïohi jongnga kaba ïadei bad ka jinghikai niam kam long katkum ka jingthmu jong u Blei.
C. B. Iawphniaw
