Shillong, Ïaiong
Ka Meghalaya Commercial Truck Owners and Drivers Association (MCTODA) ka la rai ban sangeh kit coke khlem buh por na Nongjri ban pyrshah ïa ka jingdawa 50 percent jong ka South West Khasi Hills Truck Owners and Driver Association.
Kane ka jingshimrai ka dei ha ka jingïalang jong ka MCTODA South West Khasi Hills District bad ka MCTODA kaba la long mynta ka sngi ka 8 tarik Ïaiong 2026 ban pyrshah ïa ka jingdawa ka South West Khasi Hills Truck Owners and Drivers Association kiba la dawa haduh 50 percent.
U Bah Philandar Thongni uba dei u Secretary ka MCTODA South West Khasi Hills u la ïathuh ba ha kine ki lai snem haba ki pynïaid ïa ki kali ban kit coke ka la long kaba ïaid beit hynrei da ka jingmih kawei ka seng kaba la dawa ban ai haduh 50 percent kane ka la long kumba phiah jaidbynriew.
U la ong ba lada pdiang ïa ka 50 percent ba dawa kane ka South West Khasi Hills Truck Owners Association kan sa pynkulmar namar kiwei ki district kin sa pan lang, kumta ka MCTODA kam kwah ban phiah jaidbynriew hynrei kan ïaid ryntih lada ïoh shi lynti ne ar lynti shi bnai ai kan ïaid beit da ka jingkheiñ ne ‘serial number’.
U la ong ba ha kane ka jingïalang kaba la long mynta ka sngi ki la ïamir jingmut lang baroh ki trai trok bad nongñiah trok ba lada kiwei ki seng kim hun ban ïaid da u ‘serial number’ kin sangeh baroh ban kit coke na Nongjri.
Na ka liang u Bah Moslander Marngar uba dei u Chairman ka MCTODA u la ong ba ha kine ki snem kam ju don ka kynrum kynram kumba jia mynta hynrei ka kynhun kaba dei ka Nongjri Trade Welfare Association kaba la kwah ïa ki ban pynbeit ïa kine ki kynrum kynram ka dei ka jingdon ki kynhun trei mon sngewbha bad ki briew na ki seng saiñpyrthei kiba pynmih ïa kane ka kynrum kynram.
U Bah Moslander u la kyntait ïa ka jingshah kynnoh ba ka MCTODA ka leh donbor hynrei kane ka mih dei na South West Khasi Hills.
