Nongpoh, Ïaïong 10
Hadien ka jingsaphriang jong ki durkhih kiba la pyn-i ba ka la don ka jingsdang ban pom dieng ha u Lumpongdeng uba don hapdeng ka Pung Umïam, u District Tourism Officer (DTO) ka Ri-Bhoi District, u Bah Ban Nongkynrih u la pynshai paidbah ba kane ka jingleh kam dei satia kaba la don bynta da ka Sorkar, hynrei kaba la shim kabu da ki ‘riew shimet.
Utei u heh ophisar ka tnad kam jngoh kai pyrthei ka Ri-Bhoi u la ïathuh ruh ba tang mar ïa ïoh jingtip halor katei ka jingpom dieng, na ka liang ka tnad ka la buh ïa ka jing ujor sha thanad Umïam bad pyntip ruh ba ha ka jingtohkit jong ki pulit, la ïoh ban kem ïa 2 ngut ki briew kiba donkti.
U la ïathuh ruh ba ka tnad ym tang ba ka la dep ban ujor ha thanad Umïam, hynrei ka la pyntip ruh sha ka tnad Forest ka Jylla bad la khmih lynti ba kin pynlong ïa ka jingjurip lashai ka sngi halor katei ka jingkynnoh pomdieng ha ka dewlynnong Lumpongdeng.
Na ka liang jong u Deputy Commissioner ka Ri-Bhoi, u Abhilash Baranwal haba kren sha ki lad pathai khubor hadien ka jingïalang kaba khot pynlong da ka District Tourism Promotion Society (DTPS) ka Ri-Bhoi, u la ïathuh ba lyngba kane ka jingïalang, la ïoh ban pynshai sha ki shnong ka thaiñ Umïam halor ka jingthmu jong ka Sorkar ban tei ïa ka 5-Star Taj Resort & Spa ha Umïam khamtam ha kaba ïadei bad ka dewlynnong Lumpongdeng kaba pyrshah jur da ka Green Tech Foundation.
U Baranwal u la ïathuh ruh ba ha kane ka jingïalang kaba la wan ban ïadon bynta lang naduh ki 5 tylli ki shnong ka thaiñ Umïam ba kynthup ïa ka Mawlyndep, Umbir, Umñiuh, Umsaw bad Umïam, ka Meghalaya Energy Corporation Limited (MeECL), ka Meghalaya State Pollution Control Board (MSPCB) lem bad ka tnad kam jngoh kai ka long kaba seisoh da kaba pyntip ruh ba hadien ka jingïoh jingpynshai, kitei ki 5 shnong ka thaiñ Umïam, ki la pynpaw ïa ka jingkyrshan pura ïa katei ka jingthmu jong ka Sorkar ban tei ïa ka Taj Resort & Spa ha Umïam ban pynlong ïa ka Jylla kum ka jaka jngohkai kaba pawnam ha ka pyrthei.
Na ka liang ka Green Tech Foundation kaba dang pynlong ïa ka jingshah thngan ba khlem buh pud ha nongbah Shillong ka la kyntait ban wan ïashim bynta ha kane ka jingïalang.
Lyngba katei ka jingïalang, kitei ki shnong ka thaiñ Umïam ki la ai ïa ka jingkyrshan ba pura, ki la dawa ruh ba ki khun samla jong ka thaiñ Umïam ki dei ban ïoh-kam ïoh-jam bad ïoh jingmyntoi lyngba ka jingtei ïa katei ka projek kaba shongdor da ki spah klur tyngka.
Shuh shuh ha kaba ïadei bad ka dewlynnong Lumpongdeng, u Baranwal u la pynshai ruh kan ym don satia kano-kano ka jingtei kaba neh shirta, hynrei tang ki jingtei kiba lah ban weng noh tang shi por ar por bad kane ka la don ruh ha ka ‘Tender’ kaba la pynmih da ka tnad kam jngoh kai pyrthei ka Jylla.
