Shillong, Ïaiong 10
Ki nongïalehkai ka Meghalaya ki la ïoh ïa ka jingjop kaba khraw ha ka Khelo India Tribal Games 2026 kaba nyngkong eh, kaba la long ha Chhattisgarh naduh ka 25 tarik u Lber 2026 haduh ka 3 tarik u Ïaiong 2026, ha kaba ki la ïoh ban khur 2 tylli ki takma ksiar bad 7 tylli ki takma rnong. Ki jingïalehkai ki la pyni ïa ka jingtbit jong ki ha ki jingïalehkai tynrai kum ka jingsiat khnam, bad kumjuh ha ki jingïalehkai kum ka jingïalympat, ka jingïakop jngi, ka jingïalehkai ‘athletics’, bad ka jingïakop rah nar.
U Donkupar L. Shadap na Nongpoh, Ri-Bhoi uba la ïoh khur da ka takma ksiar ha kane ka jingïakop siat khnam, u la pynkynmaw ïa ki sngi jong ka jingtrei shitom bad ki jingïalehkai kiba la sei soh ha kaba khatduh hapoh ka jingpeit u head coach jong u, u Mim Bahadur Gurung, bad u Nandkishore kum u compound coach jong u.
“Ka jingsngewtynnad jong nga ïa kane ka jingïalehkai ka la sdang naduh ka rta kaba dang 5 snem. I Papa jong nga i ju ïalam ïa nga ban peit ïa ki jingïakop siat khnam ha ka shnong jong ngi (Ryntieh Khasi). Nga ju peit ïa ki nongïalehkai Olympic ba ki ïashim bynta ha ka siat khnam, bad ka jingkwah ban bud ïa kane ka kam ïalehkai ka la mih hapoh jong nga.”
U la bynrap, “Nga ai khublei ïa u Myntri Rangbah ka Jylla, u Conrad K. Sangma, uba la pynbha ïa ka jingïalehkai siat khnam, ki tiar siat khnam ki long kiba rem dor bha, ki shongdor kumba 3 lak tyngka, hynrei ngi la lah ban pyntbit da kaba pyndonkam ïa ki tiar ba nyngkong eh lyngba ka jingkyrshan ba la ai da u Myntri Rangbah ka Jylla ka bym shym la don lypa mynshuwa. Nga shim ruh ïa kane ka kabu ban ai khublei ïa ki coach jong nga bad ïa ka Archery Association of Meghalaya.”
Sa kawei ka nongïalehkai ka Jylla ka Kate Diamond Lyngdoh na Mawlai Kynton Massar, Shillong kaba la ïoh khur ïa ka takma ksiar ha ka Compound Women’s Archery ka la don ka jingangnud ban ïalehkai siat khnam naduh ki por ba ka dang shong skul, ka dang bate ïa ka por hapdeng ka jingpule bad ka jingïalehkai.
“Ka jingangnud jong nga ka long ban ïoh khur ïa ka takma ha madan ïalehkai ha la ïing ha ka National Games ka ban sa long shen. Ka sorkar ka la ai ka jingkyrshan bad ka la pynbiang ruh ïa ki tiar ki tar kiba donkam. Ngim kit ruh ïa kino-kino ki jinglut jingsep ha ka leit ka wan, kaba ym shym la long mynshuwa.”
U Juh Pa U Juh Nongtdu uba na Nartiang, West Jaiñtia Hills uba la ïoh ban khur ïa ka takma rnong ha ka kyrdan ïakhun ïalympat ka Greco-Roman wrestling kaba 60 kg, u dang pynkhreh mynta na bynta ka jingïalehkai National Games kaba 39 jong u snem 2027 ka ban long ha Meghalaya, bad u la don ha ka jaka ai jinghikai naduh u bnai Naiwieng 2025.
U angnud ban mihkhmat ïa ka Jylla bad ka Ri ha ka jingïalehkai, da kaba ngeit ba ka jingtrei shitom bad ka jingkut jingmut ka long ka lad ka lynti ban ïoh ïa kum kine ki jingjop.
U la pynpaw ruh, “Nga sngewkmen haduh katta-katta bad nga ai khublei ïa ka Sorkar Meghalaya kaba kyrshan ïa ki nongïalehkai, la ka long lyngba ki jinghikai ne ki coach nabar kiba pynkhreh ïa ngi na ka bynta ka National Games.”
U Isaiah Kharmawphlang, President ka Wrestling Association of Meghalaya, u la pynpaw ba ki nongïalehkai ki la ïaid lyngba ka jingpynkhreh kaba tyngeh na ka bynta ka Khelo India Tribal Games, ryngkat ka lad ban ïoh ïa ki jinghikai katkum kiba ha ka kyrdan jong ka pyrthei.
U la ong, “Ngi kyrmen ba kin kham bun ki samla kin shim bynta ha ki kam ïalehkai namar ba ka don shibun ka lad ha ka. Ngi sngewnguh ïa ka jingkyrshan ba la ïoh na ka Sorkar Meghalaya. Mynshuwa ngi ju ïaleh shitom bad kaba bun ka jinglut la kit na pla lajong. Mynta kiei-kiei ki la kylla. Ki nongïalehkai bad ki seng ki ïoh jingkyrshan bha.”
Da palat 300 tylli ki jaka ïalehkai ba la pynroi ha kylleng ka Jylla bad palat 35,000 ngut ki nongïashim bynta ha ki lympung ïalehkai jong ka Jylla, ka Meghalaya ka nang kiew kum ka jaka pdeng na ka bynta ki jingïalehkai. Ki jingjop jong kine ki samla kiba don sap kin ïarap ban pynwan dur bad pynroi ïa ka kam ïalehkai ha ka jylla, ban pynkhreh ïa ki nongïalehkai na ka bynta ki madan ïalehkai ha ka ri bad ha ka pyrthei.
