Shillong, Ïaïong 10
Ka Voice of the People Party (VPP) Youth Wing ha ka 10 tarik u Ïaïong 2026, ka la leit ban ïakynduh ïa u Bah R.Rapthap, Commissioner & Secretary Meghalaya Civil Secretariat ban pan jingshai haba ïadei bad ka jingïoh jingujor ba ïoh trei biang ka A. Ali Nagi kum ka Joint Director DHTE.
Haba kren sha ki lad pathai khubor u Bah Marbud Dkhar, President u la ïathuh ba katkum ka jingïoh jingtip ka seng ba kane ka briew ka la dei ban shongthait naduh u snem 2023 hynrei haduh mynta ka dangtrei beit kum ka Joint Director DHTE.
U la ong ba watla ka la dei ban shongthait noh ha u snem 2023 hynrei 3 snem biang haduh mynta ka dangtrei ïa ka kam kaba la pynsuba ba kane ka lah ban don ka jingïadei bad ki heh ki haiñ ka sa ïoh ka lad ban trei biang ha ka kam kum ka Joint Director.
Ha ka jingïakren bad u Commissioner & Secretary u la ïathuh sha ka seng ba ka jingtrei biang ka A. Ali Nagi kum ka Joint Director DHTE, dei namar ba ka don ïa ka jingnang jingtip kaba biang lane ka experience, kumta la thung biang kum ka Joint Director, la ong u Bah Marbud.
Nalor kata u la ong ruh ba shibun ki Khasi kiba don ka jingtip kaba biang ban trei ha kano-kano ka kam bad dei ban thungnoh da kiwei ha ka jaka jong ka A. Ali Nagi.
U Bah Marbud u la kyntu ruh ïa u Myntri ba dei khmih ïa ka pule-puthi ka Sorkar Jylla, u Bah Lahkmen Rymbui ban shimkhia halor kane ka kam ban thung noh da kiwei ha katei ka kam.
