Shillong, Ïaïong 10
U Myntri ka tnad Food Processing Industries ka Sorkar Pdeng, u Chirag Paswan ha ka Sngi Thohdieng u la ban jur ïa ka bynta kaba kongsan haba ïadei bad ka jingpynmih marbam ban pynduna ïa ka jingduhnong hadien ba la dep ot bad ban kyntiew ne pynbha shuh-shuh ïa ki mar rep ba la pynmih.
Haba kren ha ka jingïalang jong ka Parliamentary Consultative Committee kaba bud sa ka jingïalang jong ka NIFTEM Council ha Courtyard by Marriott, Shillong, u Paswan u la pynpaw ïa ka jingdonkam ban pynbeit ïa ki jingeh kiba la don lypa ha kane ka tnad, kynthup ïa ki jingduna ha ka liang ki jingtei, ka jinglah ban ïoh ïa ka jingïarap pisa, bad ki jingeh ha ki kor teknoloji.
U Myntri u la ban jur ruh halor ka jingdonkam jong ka jingïatreilang hapdeng ki tnad treikam ka Sorkar Pdeng ban pynsuk ïa ka kam, bad ïaroh ruh ïa ki jingthmu jong ka Sorkar halor ka jingpynbeit ryntih ïa ka GST, ïa ki kyndon ïada ba ïadei ki marbam, bad ka jingïatreilang jong ki tnad treikam bapher-bapher.
Ïa ki jingïalang la pynlong ha ka jingdonlang ki ophisar ba rangbah jong ka tnad ba kynthup ïa u Avinash Joshi, Secretary ka MoFPI, bad u Devesh Deval, Joint Secretary ka MoFPI, ha ryngkat ki dkhot ka Ïingdorbar Parliament bad kiwei ki nongshim bynta.
Ha ka jingïalang jong ka Parliamentary Consultative Committee, la khmih bniah ïa ka tnad pynmih bam, kynthup ïa ki jingpynkylla kiba dang ïaid bad ki jingthmu jong ka tnad ha ka liang ki mat treikam.
Ka la don ruh ka jingbatai bniah halor ki jingpynkylla ba la pyntreikam bad ba la tyrwa da ka MoFPI, bud sa ki jingai jingmut na ki dkhot ka Komiti halor kumno ban pynkhlaiñ ïa ka tnad bad ban pynbha ban pynpoi ïa ki lad jingshakri bad ki jingktah jong ka.
Shuh shuh ka jingïalang jong ka NIFTEM Council ka la ïakren halor ki mat ba kongsan kiba ïadei bad ka ‘Capacity Building’, ka jingwad bniah, bad ka jingpynkhlaiñ ïa ka jinglong-jingman ka rukom pynmih bam ha ka ri.
Na ka liang ki dkhot ki la ïakren ruh halor ki lad ki lynti ban pynïahap bad ki saiñdur jong ki tnad treikam bad ki jingdonkam jong ka karkhana lem bad ki lad ki kabu kiba dang mih ha ka liang kane ka tnad.
