Shillong, Ïaïong 10
Ka Assembly Estimates Committee ka la bthah ïa ka tnat Social Welfare ba kan pan jingïarap pisa na ka Sorkar Pdeng bad Sorkar Jylla ban tei ïa ki Anganwadi Centre ha ki palat 1600 tylli ki shnong ha Meghalaya ki bym pat don ïa kine ki jingshakri paidbah.
U Chairman ka Assembly Estimate Committee u Bah Mayralborn Syiem haba kren sha ki nongthoh khubor ha ka sngi Thohdieng hadien ba wai ka jingïalang bishar kam, u la pynpaw ïa ka jingsngewkhia na ka bynta ki 1600 kito ki shnong kiba ym pat ïoh ïa ki Anganwadi Centre bad ïathuh ba ka Committee ka la shimkhia ban ai jingmut ïa ka tnad Social Welfare ban wad ki lad ki lynti na ka Sorkar Pdeng bad na ka Sorkar Jylla ban pynïoh ïa ki shnong kiba ym pat don Anganwadi Centre haduh mynta. Ka Committee ka la pynksan ruh ban wad ki lad lynti na ka bynta ban weng ïa ki jingeh haba ïadei ka jingshongkha khleh bad ka jingarmet ha ka rta ba dang khynnah.
U Bah Mayralborn u la pynpaw ïa ka jingdonkam ban pynsngewthuh ïa ki nongshong shnong, khamtam ïa ki samla, lyngba ka jingthmu jong ka Mission 1000. “Ngi donkam ban pynsngewthuh ïa ki samla shynrang bad kynthei jong ngi ban lait na ki jait jingeh khamtam eh haba ïadei bad ka shongkha khynnah bad ka jingarmet ha ka rta ba dang khynnah. Ngi donkam ban kynthup lang ïa ki nongïalam niam, ki nongïalam shnong, ki seng kynthei, ki seng treimon sngewbha bad ki sengbhalang ban pynsngewthuh ïa ka bynta jong ka tnat Social Welfare.”
U la ban jur ïa ka jingdonkam ban ïatreilang ban ïaleh pyrshah ïa ki jingeh ha ka imlang sahlang, da kaba ong, “Kum u nongthaw aiñ, nga sngew ba ka dei ka kamram jong nga ban pynthikna ha kano-kano ka jingïalang paidbah ban pynsngewthuh ïa ki briew ba ngi hap ban ong em ïa u drok, em ïa ka jingshongkha khynnah, em ïa ka jingarmet ha ka rta ba dang khynnah, em ïa u duma bad ïa kiwei de ki jingeh kiba don ha ka imlang sahlang. Ngi donkam ban ïatreilang ban pynthikna ba kan ai jingmyntoi ïa baroh.”
Ka Committee ka la shong bishar ïa ki 5 tylli ki tnat treikam Sorkar ba kynthup ka tnat pule puthi, PWD, PHE, Information Technology bad ka tnat Pulit.
Haba bynrap u la ong ba ka jingpeit bniah jong ka Estimate Committee kam dei ban kdew kti ïano-ïano bad ban kynnoh ïano-ïano, hynrei ban pynthikna ba ki skhim bad ki Mang tyngka kiba la mynjur hapoh ka ïingdorbar ki dei ban poi sha ki paidbah jong ka Jylla baroh kawei.
