Imphal, ïaïong:
Ka kynhun synrop lang jong ki sengbhalang Meitei bad ki seng pule puthi kiba don ha Delhi, ha ka sngi Palei ki la dawa ban kem ïa kiba don sha lyndet jong ka jingshah ther bom ha ka ïing jong uwei u shipai Border Security Force (BSF) ha Bishnupur jong ka Manipur, kaba la pynïap ïa ki arngut ki khun jong u ha kaba sdang jong kane ka taïew.
Kine ki heprit ki dei kiba la tip kyrteng kum u Oinam Tomthin, 5 snem ka rta bad ka para ba dang rit jong u, ka Oinam Yaisana, kaba dang 5 bnai, ki dang thiah lyngngai, ha ka por ba katei ka jingbthei bom ka la jia, ka la bthei ha ka ïing jong ki ha Tronglaobi jong ka Bishnupur, ha ka por step jong ka 7tarik, Ïaïong.
Ki sengbhalang kiba kynthup ïa ka Meitei Heritage Society, ka Delhi Manipur Society (DeMas), ka TMP Manipur, ka NUPI, bad ka Delhi Manipur Academics Fraternity ki la kynnoh ba ki lehnoh Kuki ki dei kiba donkti ha kane ka jingthombor.
Katba ki pulit ki la ong ba ki la kem ïa lai ngut ki lehnoh jong ka United Kuki National Army (UKNA) ha ki jingtreikam hadien ka jingshah bom, kim shym la ai jingtip bniah la kine ki jingkem ki don jingïadei beit ne em bad ka kam lehnoh ha Bishnupur.
