Shillong, Ïaïong 10
U Working President ka NPP Meghalaya, Bah Hamlet Dohling u la pyntip ba ka NPP kan sa pynbna ïa u kyrtong ban ïakhun ïa ka ilekshon (shiteng samoi) MP Lok Sabha na Shillong Parliament Constituency ha u bnai Jymmang.
U la ïathuh ba ka NPP ka la dep ïashong pyrkhat ïa ka ilekshon shiteng samoi jong ka MP hynrei kan sa shong biang ha u bnai Jymmang ban ïoh pynbna noh ïa u kyrtong khnang ban pynithuh ïa ki paidbah.
Shuh shuh u la ïathuh ba ki don kumba lai ngut kiba pan tiket na ka seng NPP kiba kwah ban ïakhun ha kane ka ilekshon.
U la pyntip ba ka NPP kan ïakhun beit ïa kane ka ilekshon shiteng samoi.
Kumban shu pynkynmaw ka jingpynkhreh ïa ka ilekshon shiteng samoi jong ka MP Lok Sabha ka dei hadien ka jingkhlad noh u Dr. Ricky A.J. Syngkon uba jop na ka seng Voice of the People Party.
Na ka liang ka VPP ruh ka la dep pynbna ba u kyrtong ban ïakhun ha kane ka ilekshon ban wan un dei u Dr. Batskhem Myrboh uba dei u nongaiktien ka VPP.
Katba kiwei ki seng saiñ pyrthei kum ka UDP, HSPDP, BJP kiba don ha ka liang Sorkar kim pat pyni dak la kin pynïeng ne ym pynïeng kyrtong.
Kumjuh ka Congress ka bym don MLA ka dang pynkhreh ban sei ïa u kyrtong.
