Shillong, Ïaïong 10
U Myntri Rangbah ka Jylla u Conrad Sangma ha ka sngi Thohdieng u la pynshai bniah biang ha kaba ïadei ka jingthmu ban tei ïa ka Taj Resort & Spa ha u Dewlynnong Lumpong-deng ba don ha Umïam Ri-Bhoi District.
U Conrad u la kdew ba ka MoU ka la kren shai ba yn ym don ki jingtei kiba neh junom ha u Dewlynnong Lumpongdeng bad ong ba ïa ka Taj Resort & Spa yn tei ha Orchid Umiam, ym ha u Lumpongdeng, da kaba ong ba ha u Dewlynnong Lumpong-deng yn pyndonkam tang na ka bynta ki jingtei kiba neh katto katne por.
“Ka kam jngohkai pyrthei ka ai jingmyntoi ïa baroh namarba ki nongshong shnong ki ïoh jingmyntoi lyngba ka jingwan ki nong jngoh-kai,” u la ong.
Shuh-shuh u la ong ba donkam ban buh bun ki Homestay bad donkam ban ai jinghikai pyntbit ïa ki nongïalam lynti sha ki jaka jngohkai, ban pynkhlaiñ ha ka leit ka wan bad ki bynta bapher bapher, kumjuh ruh u la kdew ba donkam ban kyntiew ruh ïa ki kam shna kti bad ïa kiwei pat ki kam thaiñ jingthaiñ ba baroh ki kam kin ïoh jingmyntoi hadien habud.
“Namar kata ngi donkam ïa ki 5 Star Hotel bad ngi donkam ruh ïa ki Restaurants kiba rit, kumjuh ruh ngi donkam ïa ki Homestay khnang ba ki trai shnong kin ïoh jingmyntoi,” la ong u Conrad.
Haba bynrap u Conrad u la ong ba “Phin sa kmen ban tip ba ka Meghalaya kan dei kawei na ki Jylla ba bun tam ki Homestay, ha kaba kumba 800 tylli ki Homestay la ïoh ban tei bad sa 3000 tylli la thmu ban tei thymmai ha kine ki snem ban wan.”
U la pyntikna ba ka Sorkar kan pynryntih ha ka liang ka ïoh ka kot bad ha ka liang ban pynneh pynsah ïa ka mei mariang bad u la pyntikna ruh ban wanrah ïa ki Resort kiba heh bad kumjuh ruh yn wanrah ïa ki Homestay kiba rit bad kiwei pat kiba ki nongshong shnong kin ïoh jingmyntoi.
U la pynpaw ba donkam ban ai ka jingkyrshan na baroh ban pyntikna ban pynïaid ïa kine ki jingthmu shakhmat bad u kyrmen ba ki paidbah kin sngewthuh ïa kane ka jingthmu ka Sorkar.
