Shillong, Ïaïong 10
U Chairman jong ka Estimate Committee jong ka Meghalaya Legislative Assembly u Bah Mayralborn Syiem ha ka sngi Thohdieng u la pynpaw ïa ka jingkyrmen ïa ka jingkyntiew kyrdan ne ban pynheh ïa ki ïingskul hapoh ka Mission Education ka ban pynmyntoi ïa ki khynnah skul ha Meghalaya, khamtam ha ki thaiñ nongkyndong.
U Bah Mayralborn u la ong ba ha ka jingïalang bad ki Ophisar jong ka tnad Pule Puthi, ki la ïakren sani bha halor ka jingpyntreikam ïa ki jingtei jong ki bynta bapher-bapher hapoh ki ‘model college’ bad kiwei ki jaka pule.
Shuh-shuh u la ong, ka khubor ba sngewtynnad ïa ki longïing longsem kiba duna ka ïoh ka kot, ba lyngba ka Mission Education, kaba la kyntiew kyrdan ïa ki spah tylli ki skul Lower Primary ha ka Jylla, kane ka dei ka kam ba bha ba ka Sorkar ka la shim ban pynthikna ïa ki skul Sorkar ha ka Jylla bad kane kan ïarap ïa ki khun samla ban ïoh ïa ka jingnang jingstad kiba bit ba biang.
U Bah Mayral u pynpaw ba ka jingkyntiew kyrdan ïa ki skul ka kynthup ïa ki skul Lower Primary, Upper Primary bad ki Secondary School jong ka Sorkar.
“Ka Sorkar kan ym lah ban leh shisien leh ïa kane, hynrei kan leh da ki bynta. Mynta baroh ki jaka pule ka Sorkar ki la sdang pyntrei bad nga kyrmen ba ha ki por ban wan, ngin sa ïohi ïa ki jingtei” ula ong.
