Shillong, Ïaïong 10
Ka East Khasi Hills Local Taxi Welfare Association (EKHLTWA) ha ka janmiet jong ka 10 tarik u Ïaïong 2026, ki la leit ban ai ka jingkyrshan ïa ki nongïalam ka Green-Tech Foundation bad u Bah HB Nonglang, Chairman ka GTF uba la shongshah thngan khlem buh por ha madan Malki halor ka jingdawa na ka Sorkar Jylla ban wengnoh ïa ka projek ha dewlynnong Lumpongdeng kaba la ai sha ki kompeni heh spah ban tei ïa ki jingtei kum ki 5 star hotel.
Haba kren sha ki lad pathai khubor u Bah Edison Suting, Secretary East Khasi Hills Local Taxi Welfare Association (EKHLTWA) u la banjur ïa ka Sorkar Jylla ba ka dei ban wengnoh mardor ïa kane ka projek kaba la thmu ban shna ïa ki 5 star hotel ha katei ka jaka.
Halor kane ka jingïakhih ba shong nongrim jong ka GTF, u Bah Edison u la ai ka jingkitbok ïa ki nongïalam ka GTF ba kin ïakhih haduh ban da ïoh ïa ka jingjop.
“Ngim kwah ban kren bun ktien hynrei ngi shu kwah ban ai ka jingkitbok ïa ki nongïalam ka GTF ba kin sa ïoh ïa u soh jong ka jingjop halor ka jingdawa,” u la ong.
Shuh shuh u Bah Edison u la ong ruh ba ka dewlynnong Lumpongdeng ka dei ka jaka kaba itynnad bad kaba ithiang, “Kaba ngi ju tip ba ka ri Khasi jong ngi ka dei ka jaka kaba itynnad bha bad bun ki nongjngohkai pyrthei ki leit ban peitkai, lada don noh da ka jingtei kan sa long ka jaka ka bym itynnad shuh.”
U la kynnoh ruh ba kane ka jingai ïa ka jaka ha Lumpongdeng ka lah ban don ei-ei sha lyndet bad ngim tip ba mano ba la ai bor ban shna ïa ki jingtei ha katei ka jaka kaba itynnad.
