Shillong, Ïaïong 10
Ka Green-Tech Foundation ka la kynnoh ba u Myntri Rangbah ka Jylla u Conrad K Sangma u la ïalam bakla ïa ki paidbah ka Jylla halor ka jingong jong u ba Sorkar Jylla ka la khang ban shna ïa ki jingtei kiba neh lane ‘Permanent’ ha u dewlynnong Lumpongdeng u ba don hapdeng ka pung Umiam.
Haba kren sha ki nongthoh khubor u General Secretary ka GTF u Bah Ritre Lyngdoh u la ong ba u Conrad u la pynshai ïa ka jingïateh kular ka Sorkar Jylla bad ka Tourism Department hynrei u khlem pynshai ïa ka jingïasoi soskular ka Sorkar bad ka Indian Hotels Company Limited bad u la kdew ba katkum ka RTI ba la ïoh ka GTF ka ‘Consent to Establish’ (CTE) ka batai shai ba la ailad ban shna ïa ki Resorts, Restaurants, Villa bad Cafe, hynrei u la bynrap ba kumno u Conrad u ong ba ïa ki Villa yn tei tang katto katne por.
Shuh-shuh u Bah Ritre u la ong ba ka dewlynnong Lumpongdeng ka dei ka jaka shong jaka sah ki sim ki doh bad ki jingthaw ba im bad ka jingwanrah ïa ki tamasa ki jingput jingtem ha katei ka jaka ba itynnad kan pynduh pyndam ïa ki jingthaw ba im kiba don ha utei u lum. “Ngim kwah ban pynlong jaka khaïi ïa u dewlynnong Lumpongdeng” u la ong.
Kum ban shu kdew ka Green-Tech Foundation halor kane mat ban tei ïa ka Taj Resort & Spa ka la pynpaw ïa ka jingpyrshah jur ha kaba u nongïalam jong ka Foundation u Bah H Bansiewdor Nonglang u la sdang ïa ka jingïakhih shah thngan ba khlem buh por na khmat ka Secretariat ha ka 9 tarik Ïaiong 2026.
Ka jingïakhih ba khlem buh por u nongïalam ka GTF mynta ka dang bteng ha madan Malki Shillong bad kaba la long mynta arsngi shimit.
