Shillong, Ïaïong 10
U Chairman ka Green-Tech Foundation u Bah HB.Nonglang ha ka janmiet jong ka sngi Thohdieng, u la kyntait mardor ban shah test ne shah peitbniah ha ki doktor jong ka koit ka khiah, haba ïadei bad ka jingshah thngan jong u.
Ka jingkyntait jong u HB.Nonglang ka dei namar ba ki doktor ba peit ïa ka koit ka khiah kim shym la wan peit naduh basdang ka jingshong shah thngan ha madan Malki hynrei ki wan ha ka por janmiet hadien ba la ïoh jingtip ba la sdang tlot ka met.
Ki doktor ba peit ïa ka koit ka khiah mynta ka janmiet ki la wan poi ha madan Malki ka jaka ba shongshah thngan u Chairman ka GTF, hynrei na ka liang jong u um shah ba ki doktor kin peit bniah ïa ka koit ka khiah jong u, kaba la pynlong ïa ki doktor ba kin shim tang ka kyrteng.
Haba kren sha ki lad pathai khubor haba kyntait ïa ka jingshah ban peitbniah ki doktor u Bah HB.Nonglang u la ong ba ka jingshah thngan jong u ka la sdang naduh hynnin ka sngi bad ka la poi kumba 25 kynta tam eiei hynrei ki doktor ba peit ïa ka koit ka khiah kim shym la wan.
“Ki doktor ha ka jingshisha ki la dei ban wan naduh hynnin ka janmiet ne mynne mynstep hynrei ki wan pat haduh da miet hadien ba la ïoh jingtip ba nga la tlot ha ka met ka phad,” u la ong.
“Ka tnad ka koit ka khiah ka dei ban shim ka jingkit khlieh ba balei haduh katta por ki phah ïa ki doktor ban wan peit bniah ïa ka jinglong jingman ha ka met jong nga. Ngan nym pdiang da lei lei ruh em ba kin wan peitbniah ïa ka met jong nga. Lada ngi donkam ban peitbniah ha ka met ngi phah hi da ki briew lajong,” la ong shuh shuh u Bah HB.Nonglang.
Da kaba bynrap ruh ba lada dei ban ïap ka la dep jia naduh mynstep bad kane kam dei ka kam ka ban shu ïa leh shet jakai khyllung eiei bad lada donkam ban peibniah ki doktor ki la dei ban wan naduh mynstep.
“Nga kyntait ba ki doktor kin wan ban peitbniah ïa ka met jong nga,” la bynrap shuh shuh u Bah HB.Nonglang.
