Shillong, Ïaiong 10
Ka Annual School Sports and Athletics Meet 2026, ryngkat bad ka Inter-School Athletics Meet 2026, la pynkut noh da kaba jop ha ka sngi Thohdieng ha madan ïalehkai jong ka Gorkha Pathshala Higher Secondary School, Mawprem.
U Myntri ka tnad ïalehkai u Bah Wailadmiki Shylla uba la don lang ha kane ka jingïalang pynkut kum u kongsan u la ai jingkren ha kane ka jingïalang bad u la pynshlur ïa ki samla pule ba kin kham ïashim bynta ha ki kam ïalehkai kiba ïadei bad ka skul bad ki kam ba shabar jong ka skul. Da kaba shim na ki jingshem jong u hi, u la kren shaphang ka dor jong kum kine ki kam ha kaba pynwan dur ïa ka jinglong jong u.
Kane ka jingïalang ka la pynïasoh lang ïa ki samla pule na katei ka jaka pule bad kumjuh ruh na ki skul kiba wan ïashim bynta na kylleng, kiba la ïakhun ha ki jait jingïalehkai bapher-bapher. Ki jingïakop ki la pynpaw ym tang ïa ka sap shimet hynrei ïa ka jingïatreilang bad ka sap ïalehkai hi.
La pynlong da ki nongpynïaid jong ka skul, kynthup ïa kiba don ha ka ‘management’, ki nonghikai, bad ki khynnah skul, kane ka lympung ka la long kum ka rynsan ban pynshlur ïa ka jingkoit jingkhiah ha ka met (fitness) bad ka jingïadei hapdeng ki samla haba ki ïashim bynta.
Ha ka jingpynkut la don lang ki nonghikai, ki samla pule, bad ki nongwan jngohkai, kaba pynkut noh ïa ki jingïalehkai bad ban rakhe ïa ka jingpyrshang bad jingjop jong baroh ki nongïashim bynta.
