Washington, Iaiong:
U Donald Trump ha kane ka kynti, u la maham tyngeh ïa ka Iran, ba kan nym buh khajna ïa ki lieng, kiba ïaid lyngba ka Strait of Hormuz, kaba long ka bynta ba kongsan eh jong katei ka duriaw ha ka liang ka ïoh- ka kot, da kaba kynnoh ba ka Tehran, ka la pynkheiñ ïa ki kyndon jong ka jingïateh kular jong ki, kaba ar taiew hapdeng kine ki ar tylli ki ri. Ha ka jingbthei jong ki jingthoh ha ki social media kiba la pynmih ïa ki jingtieng ba thymmai halor ka jingjur, u Trump u la kynnoh ruh ïa ka Iran ba ka leh ïa ka “kam kaba sniew bha” ban pynïaid ïa ka lynti um lyngba kaba 20 percent na ka jingpynpoi umphniang ha ka pyrthei ka tuid bad ong ba ka jingtreikam jong ki lieng kan sa leit biang sha ka rukom kaba rim shen, “da ne khlem” ka Islamic Republic.
“Ka Iran, ka leh ïa ka kam kaba sniew bha, kaba khlem akor, don kiban ong, ha kaba ailad ïa ka umphniang, ba kan ïaid lyngba ka Strait of Hormuz,” ong u Trump, ha ka Truth Social platform jongu.
“Kata kam dei ka jingiateh kaba ngi don!”
Ka Tehran ka la mynjur ban ailad ïa ki jhad ban ïaid lyngba ka duriaw ba kongsan kaba jngai 167 kilomitar hapdeng ka Gulf bad ka Indian Ocean kum shi bynta jong ka jingsangeh thma kaba ar taiew. Hynrei tang 10 tylli ki jhad ki la iaid lyngba naduh ba la sdang treikam ka jingsangeh thma jong ka thma Middle East, katkum ki jingtip ba la buddien ha duriaw.
