Shillong, Ïaïong 10
U Myntri Rangbah ka Jylla, u Conrad K. Sangma ha ka Sngi Thohdieng u la pynkup burom ïa ki khynnah pule na Ri-lum Khasi bad Jaiñtia kiba la wan shakhmat ne ‘Topper’ ha ka eksamin Secondary School Leaving Certificate (SSLC) jong u snem 2026.
Ha kane ka prokram la ïashim bynta lang ruh da u Myntri ka tnad pule-puthi, Bah Lahkmen Rymbui bad u Commissioner & Secretary ka tnad pule-puthi, u Vijay Kumar Mantri nalor ki kmie ki kpa, ki nonghikai bad ki ophisar na ka tnad pule-puthi.
Haba ai khublei ïa ki khynnah pule halor ka jingjop jong ki, u Myntri Rangbah u la ong ba katto-katne snem mynshuwa, ka jingdon jong kiba ‘pass’ ha ka eksamin SSLC ka long kaba duna bha bad kane ka la pynkhuslai shi kat dei eh ïa u.
“Ka la long kaba sngewsih shi kat dei ban ïohi ïa ka jingduna ha ka jingdon kiba ‘pass’ hynrei kine kiei-kiei baroh ki la sdang ban manbha bad nga sngewskhem ba hadien-habud, ngin sa lah ban wanrah ïa ki jingkylla kiba kongsan ha ka jinglong-jingman ka pule-puthi,” u la ong.
U la pyntip ruh ba kaba kum kane ka prokram ban pynkup burom ïa kiba wan shakhmat na Ri-lum Garo yn sa pynlong ha ka 18 tarik Ïaïong, 2026 ha Tura.
“Ka jingthmu jong kane ka prokram mynta ka sngi ka long tang ban ïathuh sha phi ba ngi sngew sarong ïa phi, bad ïa ka jingtrei shitom bad jingminot jong phi la sngewnguh bad ithuh,” bad kyntu ïa kine ki khynnah pule kiba wan shakhmat ban ïaid ha ryngkat ka akor ka burom, ka jingïaineh, ka jingaiti lut bad ka jingminot.
“Kynmaw ban bud ïa ka mynsiem lajong bad ka jingsngewtynnad ha ka jingim jong phi, ha kajuh ka por, long kiba sngewrit bad kiba ïaneh ha ka nongrim,” la kyntu u Myntri Rangbah.
