Chandigarh, ïaïong:
Ka sorkar Haryana, ha ka sngi Palei, ka la wengkam shipor ïa arngut ki IAS ophisar, ha kaba ïadei bad ka jingthombor jong ka IDFC First bad ka AU Small Finance Bank kaba T.597 klur tyngka.
Kine ki ophisar kiba la shah weng kam shipor ki dei kiba la tip kyrteng kum u Ram Kumar Singh, uba dei u ophisar jong ka kynhun 2012, uba la long kum u Additional CEO jong ka Panchkula Metropolitan Development Authority, katba u Pardeep Kumar jong ka kynhun jong u snem 2012, u dei u Director jong ka State Transport bad u Special Secretary ha ka tnad Transport.
Katkum ka hukum ba la pynmih da ka sorkar, ha ka por ba la wengkam, ka jaka treikam jong baroh arngut ki ophisar kan don ha ka ophis jong u Chief Secretary.
Ha ka taïew ba la lah, ka Directorate of Enforcement (ED) ka la pynlong ïa ka jingtalasi ha ki 19 tylli ki jaka ha kylleng ka Chandigarh, Mohali, Panchkula, Gurgaon bad Bangalore ha kaba ïadei bad ka jingjia jong ka IDFC First Bank.
Ha ka jingtalasi, palat 90 tylli ki Bank Account la khang, bad la kurup ïa ki tiar kiba pynngat ha ka dur jong ki Digital bad kumjuh ruh ïa ki sakhi sabut, la ong ka kynhun ED ha ka kyrwoh khubor.
Ka Chandigarh Zonal Office jong ka kynhun ED ka la pyntip ba ka pisa ka dei kaba la pyndonkam bakla na ki Account ka sorkar Haryana, Chandigarh Municipal Corporation bad kiwei pat ki tnat sorkar.
Ka kynhun ED ka la sdang ïa ka jingtohkit katkum ka PMLA, 2002, kaba la pynshong nongrim ha ka jingujor ejahar kaba la buh jingthoh da ka State Vigilance and Anti-Corruption Bureau, Panchkula, ha u bnai Rymphang, 2026 ha kaba ïadei bad ka jingbym ïahap ki Balance ha ka Bank Account jong ka Development and Panchayat Department, Haryana, ba la ïadei kam bad ka IDFC Bank bad AU Small Finance Bank.
Ïa ka pisa la dei ban buh kum ka pisa ba la buh tikna ha ka bank; hynrei ki briew kiba shah kynnoh ki la pynkylla ïa ka rukom buh ïa ka pisa sorkar khlem jingbit, la ong ka kynhun ED.
Ka jingkhynra ka la ktah ïa ki nongtrei barim jong ki Bank, kata u Ribhav Rishi bad u Abhay Kumar, kiba haïing ha sem jong ki, bad ki Shell Entity kiba ïoh jingmyntoi, kata ka M/s. Swastik Desh Projects, M/s. Capco Fintech Services bad ka Mis Maa Vaibhav Laxmi Interiors, M/s. SRR Planning Gurus Private Limited, ka kompeni shna mawkordor ka Sawan Jewelers bad ki nongpynroi jaka kum u Vikram Wadhwa bad ki jaka treikam jong u.
Ka jingwad bniah ka la pynpaw ba ïa ka pisa paidbah ba la shim kabu da ki briew ba shah kynnoh la pynïaid bad ki bynta ha kylleng ki kynhun ba la ñiew kyrteng.
Ka kynhun ED ka la ong ba ka rukom treikam jong uba shah kynnoh ka dei ka jingpynrung ïa ka Shell Entity, ka Swastik Desh Projects, bad ka jingpynkylla ïa ka pisa sorkar sha kane ka Account ha kaba sdang. Ki paralok jong ka Swastik Desh ki long ka Swati Singla bad u Abhishek Singla.
Ïa kane ka jingleh thok la pynneh pynsah ha une u snem ba la dep, kumba la antad, da ka jingïarap jong ki nongtrei barim jong ka bank, la ong ka kynhun ED.
U Rishi, uba dei uwei na ki nongtrei barim jong ka IDFC First Bank, u la pyndonkam ïa ki kompeni Shell bapher bapher na ka bynta ban shim kabu ïa ka pisa jong ka bank.
Katto katne na ki jingmih na ka kam runar la phah wat sha ki Bank Account jong u Rishi bad ka kurim jong u, ka Divya Arora, ong ka kynhun ED.
Nalor kata, ka pisa kaba bun bha ka la shah rong noh ha u Wadhwa, u nongpynïaid hotel bad nongpynroi jaka uba pynïaid ïa ki projek bapher bapher ha Mohali, la ong ka kynhun ED.
