Patna, ïaïong:
Lai ngut ki samla ki la shah kem na Buxar distrik kaba don ha Bihar, halor ka jingkynnoh ba ki la pyrshang ban wad jingtip barieh na ka ophis jong u Myntri Rangbahduh ka ri (PMO) ha New Delhi bad hadien kata ki la thmu ban thombor ïa u Myntri Rangbahduh ka ri u Narendra Modi.
Kine ki samla ki dei kiba la shahrah na ka shnong Asha Parari kaba hap hapoh ka jingkhmih jong ka Simri Police Station jong ka Dumraon Sub-division jong ka Buxar distrik.
La kynnoh ba ki don ka jingïadei bad ki kynhun syntiat jong ki bar ri bad la kynnoh ba ki la pynmih ïa ki jingtip barieh sha ki.
Ki heh pulit ki la ïathuh ba la kynnoh ba kitei ki samla ki la thaw ïa ka jingthmu ban thombor ïa u Modi ha kine ki lai taïew ban wan.
Ki pulit ki la ïoh kurup ïa kawei ka laptop bad kiwei kiwei ki tiar electronic ha ka jingkhynra kaba la pynlong ha ki ïing sah jong ki suba donkti ha ka por janmiet jong ka sngi Balang.
U Shubham Arya, SP ka Buxar, u la pynthikna ïa ka jingkem ïa kine ki samla bad u la ong ba ïa ki la tohkit ha kawei ka jaka kaba rieh.
La thaw ïa ka kynhun tohkit ba kyrpang (SIT) hadien ba la ïoh jingtip barieh shaphang kine ki samla, ba kynthup ïa u Aman Kumar, uba pynïaid ïa kawei ka Cybercafé Centre.
U SP u la ong ba ïa kane ka jingkhynra baroh kawei la leh da ki pulit ka distrik bad kyntait ïa ka bynta jong ka kynhun pulit na kano kano ka jylla.
Na ka jingtohkit kaba hashwa ka la pynpaw ba ki samla ki la ïakynduh ïa ki briew kiba ïadei bad ka tnad wad bniah jong ka USA, ka CIA.
“Ïa ki jingjia ba mynshuwa jong kine ki suba donkti dang ïaid shakhmat ban pyntikna. Ka jingtohkit ba nyngkong ka la lap ba u Aman u la shah kem kham mynshwa ha kaba ïadei bad ka kam thok ha ka cyber. Ka jingtohkit kaba kham bniah kan pynshai ïa ki jingïadei jong ki shabar ri,” ong u SP.
U ophisar uba tohkit u la ïathuh ba u Aman u la shah kem ha u snem 2022 namar ba u la pynmih ïa ka jingbyrngem ban tuh ïa kiei kiei baroh kiba la pyntreikam bad buh hapoh ki kor kompiwtor jong ka Kolkata International Airport.
Ha kajuh ka por, u kpa jong u Aman, u Ganesh Tiwari bad ka kmie jong u, ka Geeta Devi, ki la kyntait ba u khun jong ki, u donkti ha kino kino ki kam be-aiñ. Ki kmie ki kpa ki la ïathuh ha ki lad pathai khubor ba kim tip ïa ki jingshah kynnoh ha kaba u khun jong ki u la shah kem ha ki pulit.
Ïa ki tiar electronic kiba la ïoh kurup ha kane ka jingkhynra yn phah ban leh ïa ka eksamin Forensic, la ong u ophisar.
“Katto katne ngut ki briew kiba riam da ki jingriam paidbah ki la leit jngaoh ïa ka ïing sah jong ngi ha ka por janmiet bad ki la kyrpad ïa u Aman ban leit ryngkat bad ki. U Aman u dang pynkhreh ïa ka jingbam miet haba ki la rung shapoh ïing bad ki la ïalam ïa u ryngkat bad ki”, la ong ka kmie jong u Aman, ka Geeta Devi.
Katba ki pulit ki la khang khyrdep ïa ka kamra kaba u Aman u ju shongthait. Ka jingshah kem jong u Aman ka la pynlong ïa ki nongshong shnong ha ka jingkyndit kaba khraw.
“U paw kum u khynnah shnong uba im shisur shidur. Ngim ju lap ba ki kam jong u ki long ki ban shah suba sniew”, la ong ki nongshong shnong.
