Shillong, Ïaïong 10
U khlieh nongïalam ka National People’s Party (NPP), u Conrad K. Sangma u la pynpaw ba ka seng shen kan sa rai haba ïadei bad ki kyrtong ki ban ïa aireng ha ka ilekshon shiteng samoi jong ka Shillong Lok Sabha bad ka jingthep kyrteng na bynta ka Rajya Sabha.
“Shen ngin sa don ïa ka jingïalang bad ka seng kan sa rai noh shen haba ïadei bad kine baroh ar tylli ki bynta,” ong u Conrad ha ki nongthoh khubor ha ka Sngi Thohdieng.
Haba kylli halor ka jingïaid la ka jong ka BJP, u Conrad u la ong, “Kam lei-lei namarba ha ki ilekshon, man la ki seng ki don la ka jong ka hok synshar paidbah ban ïakhun. Ha ka kynhun synrop, ngi khmih lynti ïa ka jingïakren hashuwa, hynrei kam da long than kaba donkam ba ngin hap ban ïa mynjur lang ha baroh ki liang.”
U Conrad u la bynrap, “Nga burom ba man la ki seng ki don la ka jong ka jingithuh ba kyrpang, ka riti-synshar, bad ki hok ban ïakhun ha ka rukom jong ka synshar paidbah. Ngin ym tuklar haba ïadei bad kata. Man la ka seng ka don ïa ka hok ban shim ïa ka rai.”
