Shillong, Ïaïong 10
Ka Voice of the People Party (VPP) ha ka Sngi Thohdieng, ka la ïoh ban sieh ïa ka lama banyngkong jong ka ha Ri-lum Garo ha kaba la ïoh ban thung ruh ïa ka ‘Adhoc-Committee’ jong ka seng, kata ka VPP Garo Hills Zone.
Ka kyrwoh na ka seng ka ïathuh ba ha ka jingïalang kaba la long ha Tura hapoh ka jingïalam u President, Bah Ardent M. Basaïawmoit, la ïadonlang ruh ki ‘riew rangbah, ki samla na ki distrik bapher-bapher ka Ri-lum Garo bad la ïoh ruh ban jied ïa ki nongkitkam jong ka ‘Adhoc-Commiittee’ ba kynthup ïa u President, u Kronolite Marak, bad u Secretary – Ronald S. Sangma.
Ha kajuh ka por, la jied ruh ïa ki dkhot EC ba kynthup ïa u Ryan S. Marak, Joba Marak, Tengsim Momin, Jim Reeves Momin bad u Thinker Marak.
Nalor kine, la jied ruh ïa 3 ngut ki ‘Adviser’, Dr. Meril Sangma, David Ch. Marak bad u Ajay M. Marak; Adhoc President ka Youth Wing – Abhi D. Sangma bad Secretary – Salchura S. Sangma.
U Bah Ardent u la pynpaw ka jingsngewkmen halor ka jingïoh ban thung ïa ka ‘Adhoc-Committee’ jong ka seng ha Ri-lum Garo, kaba ki paidbah na kane ka thaiñ ki la angnud la slem, hynrei ka seng kam pat kyrkieh namarba ka kwah ban da pynsngewthuh bad pynngam bha ïa ki nongrim jong ka bad khamtam eh ban ïoh ïa ki briew kiba skhem ka nongrim bad kiba lah ban shaniah.
Ha kane ka sngi la pynlong ruh ïa ka jingpynrung dkhot ha kaba kiba bun ki la pynrung dkhot sha ka seng ryngkat bad ka jingkular ban trei bad pynkhlaiñ bad pynsuh thied ïa ka VPP ha Ri-lum Garo.
