Washington, Iaiong:
U President ka United States, u Donald Trump, hadien ba u la sngewrem halor ka jingbym ai jingkyrshan jong ka NATO ia ka US ban synshar donbor hi halor ka ‘Strait of Hormuz’, u la sngew bitar bad ong ba ka jingthmu jong u ban synshar hi ia ka Greenland kam shym la sei-soh bad kumta ruh u la iakren bad ki nongkitkam jong u ban weng noh ia katto- katne ki shipai na Europe.
Watla katta, la ong ba ym pat shym la don kano kano ka jingshim rai ba thymmai bad ka White House kam shym la bthah ia ka Pentagon ban shna ia ki plan kiba skhem na ka bynta ban pynduna ia ki shipai ha katei ka dewbah, la ong utei u heh sorkar, uba la pan ban nym pynpaw kyrteng ban iakren ia ki jingiakren hapoh jong ka. Hynrei tang ki jingïakren ki pynpaw haduh katno ka jingïadei hapdeng ka Washington bad ki paralok NATO jong ka na Europe ka la nang sniew ha kine ki bnai ba la dep.
Ki ai jingmut ruh ba ka jingleit jngoh ïa ka White House ha ka sngi Thohdieng da u Secretary-General ka NATO, u Mark Rutte, kam shym la lah ban pynbha shibun ïa ka jingïadei hapdeng ka Atlantic, kaba lah ban ïasaid ba ka don ha ka kyrdan kaba poh tam naduh ba la seng ïa ka NATO ha u snem 1949.
Ka US mynta ka don palat 80,000 ngut ki shipai ha Europe bad ka la don ka bynta kaba kongsan ha ka jingtei ia ka jingshngain jong ka Europe naduh ka thma bah ba ar. Palat 30,000 ngut na kita ki shipai ki don ha Germany, bad kiba bun ki don ruh ha Italy, ha ri Bilat bad ha Spain.
