Daniella Damayaika Lamare
Bio :Ka Daniella Damayaika Lamare ka dei ka wildlife biologist kaba trei ha ki kam jingïada ïa ka ma-riang bad ki mrad khlaw bad kaba ïatreilang bad ki shnong ha ki bynta bapher bapher jong ka jylla. Ka trei kum ka scientist ha ka seng Conservation Initiatives, Shillong.
Ka jylla Meghalaya ka long kawei na ki jaka ha Northeast India kaba riewspah ha ki jait jingim ki bapher bapher. Ki khlaw rben, ki wah bad ki jaka mariang ki ai jaka sah ïa shibun ki jait mrad bad jingthung. Napdeng kine, ki bseiñ ki dei ki jing-thaw kiba don bynta ba kongsan ha ka mariang, hynrei bun ki briew ki dang sngew sheptieng bad kim tip bha shaphang jong ki.
U Bseiñ Khyndew Saw u dei u bseiñ uba ngi ju khot ha ka ktien phareng da u Assam Snail Eater (Pareas monticola) bad u long uwei u bseiñ uba kyrpang ha kane ka thaiñ. Une u bseiñ u bam khamtam ïa ki mattah. Ka rukom bam jong u ka pyni ïa ka rukom ba ki mrad ki im katkum ka mariang.Kane ka jingïadei hapdeng u bseiñ bad ka jingbam jong u ka long kaba pyni ïa ka jingitynnad bad ka jingïatylli jong ka mariang. Une u bseiñ u im bha ha ki jaka kiba sngem kum ha ki khlaw ba bun sla ïap, bad ha ki bynta marjan wah. U dei u bseiñ uba kham rit bad uba don ka dur kaba kham pher na kiwei pat ki bseiñ. Ka met jong u ka long saw-byrtem thoh ïong kaba ïarap ïa u ban rieh bha hapdeng ki sla ïap bad ki dieng ïap ha khlaw.
Watla kine ki bseiñ ki don bynta kaba kongsan ha ka mariang, bun ki briew ki sheptieng ïa ki. Bunsien lada ki briew ki ïohi ïa une u bseiñ, ki pynïap noh mardor namar ba ki sheptieng bad kim tip bha shaphang jong u. Hynrei, ym baroh ki bseiñ ki long kiba ma ïa ki briew. Wat ki bseiñ kiba don bih ruh ki pyndonkam ïa kata tang ban ïada ïalade bad ym ban thombor. U Bseiñ Khyndew-saw u dei uwei naki ki bseiñ bym don bih.
Ka jingpynsngewthuh paidbah ka long kaba donkam bha ban pynkylla ïa kane ka jingsngew sheptieng. Haba ki briew ki nang tip shaphang ki bseiñ bad ka bynta kaba ki don ha ka mariang, ki sdang ban sngewthuh ba kine ki mrad ki dei ki bynta kiba kongsan jong ka mariang. Ki bseiñ ki ïarap ban pynduna ïa ka jingroi ki mrad rit kum ki khnai kiba pynjulor ïa ki mar rep, bad ki pynneh ïa ka jingïatylli ha ka mariang. Kumta, une u bseiñ khyndew saw ruh u ïarap da kaba bam ïa ki mattah ba pynjot ïa ki jhur ki jhep ba ngi thung.
Ka Meghalaya ka dang don shibun ki jait bseiñ kiba phylla bad kiba ym pat tip bha da ki briew. Da ka jingïatreilang hapdeng ki scientist bad ki paidbah ha ki shnong ki thaw, ki briew ki lah ban ïarap ban ïada ïa kane ka jingriewspah ka mariang. Ka jingïada ïa ki jait mrad kum kine ki bseiñ ka long kaba kongsan ban pynneh ïa ka mariang jong ka jylla na ka bynta ki pateng ban wan.
