Hyderabad, ïaïong:
U Symbud Myntri Rangbah u Mallu Bhatti Vikramarka ha ka sngi Palei u la pynbna ba ïa kane ka skhim bam jingbam step yn sa sdang ha baroh ki skul sorkar ha ka 2 tarik u Jylliew.
Haba kren ha kane ka jingïalang hadien ba la dep ban sam bicycle sha ki khynnah skul bad kolej sorkar hapoh ka jingthmu jong ka Amma Foundation ha Bonakal mandal headquarters ha Khammam distrik, u Symbud Myntri Rangbah u la pynpaw ruh ïa ka jingthmu ban wanrah ïa ka skhim bam shiteng sngi na ka bynta ki khynnah Intermediate naduh u snem pule ban wan.
U Vikramarka u la ban jur ba ka jingnang jingstad ka dei ka atiar kaba khlaiñ tam na ka bynta ban pynkylla ïa ka imlang-sahlang.
“Dei tang ka jingnang jingstad kaba lah ban tei ïa ka imlang- sahlang kaba ïaryngkat bad kaba kiew shaphrang khlem ka jingïapher”, u la ong.
Da kaba kdew ïa ki jinglap na ka jingwad bniah kaba dang shen ha ka imlang-sahlang bad ka pule puthi kaba la pynlong da ka sorkar jylla, u la pynpaw ba ka roi ka par ka long kaba lah ban ïoh tang lyngba ka pule puthi.
U Vikramarka u la ban jur ba ym dei ban don wat uwei ruh u khynnah ha ka jylla u ban leit thylli kpoh sha skul, namar ka ktah ïa ka jingpynleit jingmut bad ka jinglah ban pule.
“Da kaba buh ha ka jingmut ïa kane, ka sorkar ka la rai ban ai jingbam mynstep ïajan 20 lak ngut ki khynnah skul jong ki skul sorkar”, u la ong.
Haba kynthoh pyrshah ïa ki polisi jong ka sorkar BRS barim, u la kynnoh ba watla ki don ïa ki marpoh khyndew kiba bun, hynrei ki (BRS) kim shym la mang pisa ha ka rukom kaba dei, kaba la pynlong ïa ka jingpyndonkam bakla ïa ka spah jong ka jylla.
U Symbud Myntri Rangbah ka jylla u la pynbna ruh ba yn pynïoh ïa ki skul paidbah ha Telangana ha baroh ki 119 tylli ki Assembly konstitwensi ha ka jylla.
