Shillong, Ïaïong 12
Ka Meghalaya Pradesh Congress Committee (MPCC) kan sa shong pyrkhat ha kine ki lai taïew ban jied ïa u kyrtong ban ïakhun ïa ka ilekshon MP shiteng samoi sha ïingdorbar Lok sabha hadien ka jingkhlad noh u MP u Dr. Ricky AJ Syngkon.
Haba ïakren bad u Bah Manuel Badwar, uba dei u Secretary ka MPCC u la ïathuh ba ka Congress kan nym pat kyrkieh ban pynbna ïa u kyrtong namar kan peit shwa ïa kiwei ki seng.
U la ïathuh ban phah ïa u MP uba dang thymmai kan shim por ïa u tang ban ïoh jaka sah haduh hynriew bnai, namar wat u Saleng haba u jop ïa ka ilekshon u ïoh jaka sah hadien shisnem.
U la ong u MP uba jop mynta un ïoh ban treikam tang ar snem shiteng namar hynriew bnai ka la duh lypa haduh ban da dei por ïalap ilekshon.
U la ong, ka kamram jong u MP haba u leit sha Delhi ka long ba un buddien ïa kaei kaba u MP uba la dep u leh khamtam ban pynrung ïa ka ktien Khasi ha ka khyrnit kaba phra bad ka ILP kaba ka Sorkar Jylla ka la dep mynjur ha ïingdorbar ha u snem 2019.
Shuh shuh u la ong ban pynurlong ïa kine ki ar tylli ki mat, donkam ïa u MP na Shillong ban pynsngewthuh man la uwei pa uwei u MP kiba don ha Parliament khnang ban ïoh ïa ka jingkyrshan.
U la ai nuksa lada u MP ka Congress u jop ha kane ka ilekshon u hap ban pynsngewthuh ïa baroh ki MP Congress bad ïa ki MP kiba donlang ha ka liang pyrshah.
