Nongstoiñ, Ïaïong 12
Ki kam pynroi hapoh ka Mawshynrut Constituency ki dang ïai tuid na ka por sha ka por bad mynta ka Sorkar lyngba ka Directorate of Community and Rural Development kala khot tender na ka bynta ban shna bad tei ïa ka Block Integrated Development Complex (BIDC) hapoh Shallang, West Khasi Hills District.
Katkum ka shithi na ka ophis Directorate of Community and Rural Development bala soi ruh da u Director la kdew shai ba ïa katei ka projek la mang ban tei ha ka jinglut kaba la kot kumba 4.22 klur tyngka bad ïa ka jingtrei yn pyndep ha ki 18 bnai naduh bala ïoh ïa ka work order.
Lah ban kdew hangne ba ka jingtheh jong ka Sorkar ïa ki kam pynroi hapoh ka Mawshynrut Constituency kala long kaba khraw ha kaba ki projek kam pynroi kiba ka Mawshynrut kala ïoh pdiang ki long kiba heh bad ki ban ai jingmyntoi ïa u paidbah ka Constituency hi baroh kawei.
Ym lah ruh ban leh ïa ka jingshisha kumba ka paw ba ka jingtrei shitom jong u Bah Methodius Dkhar, MLA bad uba dei ruh u Myntri ha ka Sorkar Jylla kala pynlong ïa ka Mawshynrut ba kan ïoh pdiang shi khung ki kam pynroi kiba heh ba heh hapoh ka Constituency bad kiba bun na ki projek kam pynroi bala wanrah da u Bah Methodius ki dang ïaid shait shait ka jingtrei mynta.
