Shillong, Ïaïong 12
U Pastor JS Thongni u la ong ha kane ka juk ha kaba ka mynsiem bunsien ki briew haba ki leh ïa kano kano ka kam, kim sngewthuh ne kim ithuh hynrei U Blei u ïohi ïa kaba rieh bad kaba paw, ïa kaba rit ne kaba khraw ruh.
U Pastor JS Thongni u la kren ïa kine ki kyntien haba sam ïa ka ktien jong U Blei ha ka Jingiaseng kaba ar sien ha ka por 1:30 nohphai sngi jong ki Samla Khasi Jaiñtia Presbyterian Assembly kaba Khadar ha ka Balang Sohkymphor, Shangpung Presbytery, KJP Synod Mihngi kaba hap ha East Jaiñtia Hills District.
U Pastor JS Thongni u la kren shaphang ka jingleh bymman ka Jerusalem bad ka Juda, kumta U Blei u la kren ha u Jeremaia, u nongïathuh lypa da kaba ong, “Khie leit pyrta ha ki shkor ka Jerusalem, to ong ka jingbym hok aiu, ki kpa jong phi ki la shem ha nga ba ki la leit jngai na nga bad ki la ïa beh ïa ki jingthala bad ki la kylla thala”.
“Shisha ong U Blei nga la wallam ïa phi na ka ri ka jinglong mraw sha ka ri ba dap kyrshai ban bam ïa u soh jong ka bad ïa ka jingbha jong ka. Hynrei ynda pha la leit shapoh, pha la pyntngit ïa ka ri jong nga, ynda pha la leit shapoh pha la pyntngit bad ka ri jong nga ka jingijli,” u la ong.
U la ïathuh ba U Blei u la kem daw namar ka jingleh palat naduh uba khraw haduh uba rit tam.
Shuh shuh U Blei u la ong ïa ki Lyngdoh kiba bat ïa ka hukum phim shym la ïathuh ïa u.
U la ong biang, “Phi ki nongsynshar phi la leh palat ïa nga, phi ki nongïathuh lypa, baroh ki la ïa beh ïa ka bym myntoi, ong U Trai U Blei. Naduh uba rit tam haduh ba khraw tam, ki aiti noh ïalade ha ka jingkwah lalot.”
U Pastor Thongni u la ïathuh ba U Blei lyngba u Jeremaia u la sneng, hynrei ka Jerusalem bad Juda ki la ong ba kim shym la leh pop, kumta U Blei u la ong, “Ba namar kane ka pop, ngan tian bishar ïa pha, naba pha ong ngam shym la leh pop.”
Ha kane ka jingiaseng kaba ar sien, la pynrkhem da ka jingrwai saw sur da ka Standing Choir KJP Synod Sepngi, Standing Choir KJP Synod Mihngi bad Pdeng.
Katba ha ka jingiaseng kaba 10:00 baje mynstep la sam ïa ka ktien jong U Blei da u Pastor KS Shylla.
Ka jingiaseng KJP Assembly jong ki samla kaba khadlai kan long ha ka 7 tarik haduh 9 tarik Ïaïong 2028 ha Balang Domshohksoin, District Mawlieh, Rambrai Presbytery KJP Synod Sepngi.
Ha kane ka jingiaseng la ïadonlang ki nongsynshar jong ka jylla naduh u Bah Prestone Tynsong, Symbud Myntri Rangbah ka jylla, Bah Nujorki Sungoh MLA Moowkaiaw, Kyrmen Shylla MLA ka Khliehriat.
