Shillong, Iaïong 12
Ka seng longkmie na ka Shnong Mawdun ha ka janmiet jong ka sngi Saitjaiñ ki la wan poi ha ka jaka shongshah thngan u Bah HB.Nonglang, Chairman ka Green Tech Foundation (GTF) ha Madan Malki, Shillong, kum shibynta ban ai mynsiem bad ban ai ka jingkyrshan.
Ka jingshah thngan u Bah HB.Nonglang ka dei halor ka jingdawa na ka Sorkar Jylla ban wengnoh mardor ïa ka project ha dewlynnong Lumpongdeng, kaba thmu ban tei ki jngtei kiba heh ha ka tei ka jaka.
Haba kren sha ki lad pathai khubor ki longkmie ka shnong Mawdun ki la ong ba lada jia ba kin wan kita ki jingtei ba heh ha u tei u dewlynnong Lumpongdeng, kan sa ktah shibun, khamtam ba ki dei kiba im ja lyngba ka tei ka wah Umïam.
Kumta ki la pynpaw ban ai ka jingkyrshan ba pura ïa u Bah HB.Nonglang uba la shongshah thngan khlem buh por ban dawa wengnoh ïa ka project ha Lumpongdeng.
Shuh shuh ki la byrngem ba lada ka Sorkar ka dangsngap mynthi halor kane ka jingdawa ka Green Tech Foundation, kin sa mih paidbah ban pynlong da ka jingïakhih syndon.
“Ngi sngewkhia jur bha halor ka jingshah thngan u Bah HB.Nonglang namar haduh mynta ka Sorkar kam shym la jubab eiei halor ka jingdawa ka GTF, bad ka kheiñ sting ïa kane ka kam. Ngi kwah ba u Lumpongdeng un long u lum uba iynnad bad ka wah Umiam ruh kan long kaba khuit kaba sngur bad lada ka Sorkar ka thumb ban tei ki jingtei ngin nym ïoh shuh ka jingkhuit. Kumta ka seng longkmie na Mawdun ka ai ka jingkyrshan halor kane ka jingdawa ka GTF,” la bynrap ki longkmie.
