Shillong, Iaïong 12
Ki nongshong shnong jong ka Mawprem Dymmiew, Shillong ki la ïoh ïa ka jingpang jingshitom hadien ba ki la pyndonkam ïa ka umbam umdih kaba jaboh bad jakhliah, kaba ki la tan lyngba ka wei ka top-um kaba dei ka um na ka Public Health Engineering (PHE).
Ia kane la pyntip da u Rangbah Shnong ka Mawpren Dymmiew, u Bah Manphyrnai Marbaniang haba kren sha ki lad pathai khubor ha ka sngi Saitjaiñ jong ka taïew.
U Bah Manphyrnai Marbaniang Rangbah Shnong Dymmiew Mawprem u la ïathuh ba ki don kumba 11 tylli ki longïing kiba la tan um na ka tei ka top kab dei ka um ba wan na ka PHE.
U la ïathuh ba ki longïing ki la pyndonkam ïa ka tei ka um ban dih ban bam naduh u bnai Kyllalyngkot (January) 2026, bad haduh mynta ka tnad PHE kam shym la shimkhia ei-ei ban peit ne pynïoh ïa ka umbam umdih kaba khuit ba suba.
“Nga la thoh da ka shithi sha ka tnad PHE, ba kan peit lem halor kane ka jingïoh um ba jakhliah jong ki longïing ha Mawprem Dymmiew, hynrei haduh mynta kim shym la wan peit ne khmih ïa ka um,” u la ong.
Katkum ka Kaiphod na ka State Food Testing Laboratory haba peitbniah ïa kane ka umbam umdih, la pynthikna ba ka tei ka um kam long kaba shngaiñ bad ka don jingma lada ki longïing ki pyndonkam ïa ka tei ka um.
Namarkata u Bah Manphyrnai Marbaniang u la kyrpad biang ïa ka tnad PHE ba kan shimkhia mardor ban wan peit bad jngoh ïa kane ka um, khnang ba ki longïing hapoh ka shnong kin pynthikna ban ïoh ïa ka umbam umdih kaba khuit ba suba.
La ïohi ruh ba ki pipe um ki ïaid lyngba ka nela kaba jaboh bad i saitmet ban peit bad ka jingbym wan khmih bad peit na ka liang ka tnad PHE ki longïing jong ka shnong ki la hap ban pyndonkam da ka umbam umdih kaba jaboh.
Haba kylli, u Bah Manphyrnai u la nga “Ngim tip ba kaei ka daw ba ki ophisar ka tnad PHE kim shym la wan bn jngoh ïa kan eka um ban pynthikna ba ki nongshong shnong kin ïoh ka umbam umdih kaba khuit. Nyngkong ngi dangmut ba ka um kam lei hynrei hadien ba la dep phah peit bniah la lap ba ka um ka long kaba jaboh.
