Shillong, Ïaïong 12
U nongaiktien ka Bharatiya Janata Party Meghalaya Unit (BJP) u Bah M Kharkrang ha ka sngi Saitjaiñ u la pyntip ba ka Sorkar Pdeng ka la sangeh shwa ban wanrah ka jingpynkylla (Amendment) ïa ka Foreign Contribution (Regulation) Act (FCRA).
Haba kren sha ki nongthoh khubor u Bah Kharkrang u la ïathuh ba ka BJP Meghalaya ka la shimkhia bha halor ka FCRA bad na ka liang ki nongïalam ba kynthup u Bah AL Hek (MLA) u la dep thoh bad kynduh ruh ïa ki nongïalam ka BJP na Delhi.
U Bah Kharkrang u la ïathuh ba ka Meghalaya BJP ka la dawa na ka Sorkar Pdeng ba ka dei ban lum shwa ki jingïalang bad baroh, lada ka don jingthmu ban wanrah ka jingpynkylla (Amendment) ïa ka FCRA.
“Ka Sorkar Pdeng ka la pynsangeh shwa ïa kano-kano ka jingthmu ban wanrah jingpynkylla (Amendment) ïa ka FCRA bad ngi kyrmen ba ka Sorkar kan khot jingïalang shwa ïa baroh ha shwa ban shim ïa kano-kano ka sienjam halor ka FCRA” la ong u Bah Kharkrang.
U Bah Kharkrang u la ban jur ïa ka jingdonkam ban ïatai sani halor ka FCRA ha shwa ban wanrah ka jingpynkylla (Amendment) da ka ba ong ba kane ka Bill kan ktah ïa uba bun balang. “Kata ka dei ka jingsngew jong ka BJP Meghalaya halor ka FCRA bad ngi la ïoh jingtip ba ka Sorkar Pdeng ka la sangeh shwa ïa ki sienjam ban wanrah jingpynkylla (Amendment)” ula ong.
