Shillong, Ïaïong 12
U Ayush Shetty u la khur da ka takma rupa hadien ba u la mad ïa ka jingshah rem ha u Shi Yu Qi uba bat ïa ka kyrdan ba-ar ha ka pyrthei, ha ka final jong ka lympung ïalehkai Badminton Asia kaba la long ha ka sngi U Blei ha Ningbo, China.
Une u rangïalehkai ba dang 20 snem jong ka ri India u la mad ïa kane ka jingshah rem 8-21, 10-21 ha utei u lahduh jong ka pyrthei uba na China, katba ka jingap khmih lynti jong ka India ïa ki 61 snem ban ïoh ïa ka ksiar ha ka liang ki shynrang ha kane ka lympung ka dangïai bteng. Wat hapdeng ka jingshah rem, hynrei ka dei ka jingïalehkai kaba don burom na une u samla bym pat shah jied, uba la long uba ar na ki shynrang jong ka ri hadien u Dinesh Khanna ban poi sha ka phainal jong ka jingïalehkai jong kane ka dewbah.
U Khanna u dang long tang ma u, uba la lah ban jop ha ka jingïalehkai para marwei na ri India ha katei ka lympung, hadien ba u la jop ïa ka nam lahduh ha u snem 1965. Naduh katei ka por, tang ki arngut ki rangïalehkai ‘doubles’ kata u Satwiksairaj Rankireddy bad u Chirag Shetty kiba la rah ïa ka nam lahduh ha u snem 2023.
U Ayush uba la bat ïa ka kyrdan ba 25 ha ka pyrthei, u la rung sha kane ka jingïakhun naduh ka jingshah rem ha u Shi ha ka Malaysia Super 1000 ha kaba sdang jong une u snem bad ha ka Indonesia Masters jong ka samoi ba la dep. Hynrei, u la lah ban ïalehkai bha, da kaba u la pynliem ïa u Kunlavut Vitidsarn, u nongïalehkai ba bat ïa ka kyrdan ba saw ha ka pyrthei bad u Li Shi Feng ba bat ïa ka kyrdan ba hynñiew hashwa ba un jam sha ka phainal.
Hynrei une u rangïalehkai ka ri, uba la san na ka shlem ai jinghikai jong ka Padukone-Dravid Centre for Sports Excellence kaba ha Bengaluru, u la pyrshang ban ïakhun tyngeh hashwa ba un shah rem noh ha u Shi, uba la lah ban khanglad ïa u Ayush.
