Greenland, Iaiong:
U Myntri Rangbah-duh ka Greenland, u Jens-Frederik Nielsen, ha ka Sngi Palei u la ong ba u ieng ban mih khmat na ka ri kaba kyrshan ia ka shongsuk- shongsaiñ bad ka jinglong jingman kaba bha, bad ia kane, u Nielsen u la kren hadien ka jingkren jong u Trump haba iadei bad katei ka ri thah bad kumta u Nielsen u la ong ba ka Greenland kam dei ka ri kaba tang shi lyngkhot u thah.
U Trump ha ka Sngi Balang u la pyllait lut namar ka jingsngew kulmar khlieh jong u haba iadei bad ka NATO, hadien ba ka jingiadei jong ka US bad ka NATO ka la sdang troiñ namar jong ka thma ha Iran bad u la ong ba ka NATO kam shym la kyrshan ia ka US ha ka thma pyrshah ia ka ri Iran bad u la ong ruh ba u kynmaw ia ka Greenland kaba long ka ri kaba duk, ka bym biang eiei bad kaba long tang kum u thah ba shi lyngkhot.
“Kaei kaba kongsan na ka bynta jong ngi ka long ba ngin pynneh pynsah ïa ka imlang sahlang ha ka pyrthei kaba ngi la tei hadien ka thma bah ba ar, ha kaba ngi don ïa ka jingïateh lok jong ka jingïada kaba ngi burom, bad ha kaba ngi don ïa ka aiñ pyrthei kaba la burom da baroh ki liang,” ong ka Nielsen ha ka Reuters.
“Kita kiei kiei ki dang shah tynjuh mynta, bad nga pyrkhat ba baroh ki paralok ki dei ban ieng tylli ban pyrshang ban pynneh pynsah ia ki. Nga kyrmen ba kata kan sa jia,” u la ong.
Ki paralok jong ka NATO ki la dep ban ïaleh pyrshah ha kaba sdang jong une u snem ban wad ïa ki lad ki lynti ban pynneh ïa ka jingïatreilang hadien ba u Trump u la pynim biang ïa ka jingpynbor jong u ban knieh noh ïa ka Greenland na ka Denmark, ka para dkhot jong ka NATO.
U Nielsen ha ka Sngi Palei, u iakhun pyrshah ia ka jingpynlong dur jong u Trump ia ka ri jong u.
“Ngim dei katto katne ki lyngkhot lyngkhai. Ngi dei ka jingbun briew kaba sngew sarong kaba don 57,000 ngut ki briew, kiba trei man la ka sngi kum ki nongshong shnong babha jong ka pyrthei ha ka jingburom kaba pura ïa baroh ki paralok jong ngi,” u la ong.
