Shillong, ïaïong 12
Ka Pyrthei ha kine ki sngi ka don hapdeng ka jingeh kaba khraw haba ïadei kumno ban ïada, ban sumar ïa ka sawdong sawkun bad kawei na ki daw jong kane ka dei na ka jingpyndonkam plastic.
Ïa kane la pynpaw da u Bah Jefferson Kynjing, u ba long u nongseng ka projek ‘Clean Surrounding’ ha ka jingïalang ba la long hapdeng ki khynnah skul jong ki 14 tylli ki skul kiba don hapoh ka shnong Nongmensong.
U Bah Kynjing u la ong. “Ïa ka ‘plastic’ la shna ban pynsuk ban ïoh pyndonkam ha ki jingdonkam jong ngi, hynrei kumno ngi leh ïa ka haba ngi la dep pyndonkam bad kata ka kylla long pynban ka jingeh kaba khraw ba baroh ngi hap ban mad.”
Nalor kata u la kubur ba ka jingshna ïa ka ‘plastic’ ka pynsuk tang ha ki katto katne por, katba ka jingktah kaba mih na ka ‘plastic’ ka long kaba shimpor bha namar ka ‘plastic’ ka shimpor da ki spah snem ba kan pyut bad kane ka ktah ïa ki jingthung jingtep, ki thyllong umbam umdih kumjuh ruh ka ktah ïa u briew bad baroh ki jingthaw ba im ha kane ka sla khyndew.
Shuh-shuh u la ong ba u la sdang ïa ka projek ‘Clean Surrounding’ dei halor ka nongrim ba ka la jur palat ka jingjaboh kaba mih na ka ‘plastic’ ïa ka sawdong sawkun, namar ha kiba bun ki jingdonkam jong u briew la thaw bad shna pynwandur na ka ‘plastic’ hynrei kaei kaba donkam ban leh na ka bynta ban pynduna ïa ka jingktah jong ka ‘plastic’ ïa ka sawdong sawkun, u la ong, “Kaba ngi lah ban ïada na ka jingktah jong ka plastic, ba ngin kiar na kaba pyndonkam ïa ki ‘palstic’ ba pyndonkam tang shisien.”
U la kyntu ruh ban pyndonkam da ki pla ïew haba leit sha ïew, ban dihsha ha ki pela ym ha ki pela ‘plastic’ bad kiar ban pyndonkam ïa ki ‘plastic’ ba tang shisien pyndonkam bad kaba leh kumne kan ïarap shibun ban sumar ïa ka mei Mariang bad kan ïarap ruh ïa ki briew ban lait na kiba bun ki jingma kiba mih na ka ‘plastic’.
