Washington, Iaiong:
U Vice President ka US, u JD Vance, ha ki khyndiat sngi ba la dep, u la pynrem ia ki nongialam ka Europe ba kim lah ban leh eiei na bynta ban pynkut noh ia ka thma jong ka Ukraine bad Russia bad u la ong ruh ba kane ka long ka mat kaba eh tam napdeng baroh ki thma kiba jia ha kane ka pyrthei mynta.
Namar la ong ba ka Ukraine, ha ka Sngi Balang, ka la kyntu ia ka United States ba kan pynbor ia ka Russia ba ka dei ban pynkut beit ia ka jingleit tur bad jingleit thombor sha Ukraine, ha kaba, ka la pynksan ruh da kaba ong ba ka jingmynjur sangeh thma jong ka Iran, ka dei ka jinglah jong ka US ban pyni da ka bor. Kumta ruh ka la kyntu ia ka US ba kan leh hi kumjuh khnang ba kan lah ban wanrah noh ia ka shongsuk- shongsaiñ ba pura hapdeng ka Ukraine bad Russia.
U la ong ba ki jingpyrshang ban pynbeit ia ka jingiakynad ki la iohi ia ka “jingkiew kaba pawnam”, hynrei ka la long “ka thma kaba eh tam ban pynbeit”.
“Ngi la ioh ia ki kot na ki nong Ukraine bad ki kot na ki Russia. Ha ka jingshisha ngi la ioh ia ki ban pynpaw ia la ki jong ki nongrim, bad katba nang mih ki sngi ki nongrim jong ki ki la nang iajan bad iajan bha,” la ong u Vance.
“Bad dei na kata ka daw ba ngi la lah ban kiew katto katne. Ngim shym la lah ban leh ia ka jingkiew kaba khatduh, hynrei nga sngewskhem bha ia kane, namar ha ka nongrim ka thma ka la sangeh ban don jingmut,” u la bynrap.
U la ïaroh ïa u Myntri Rangbahduh jong ka Hungary, u Viktor Orban, uba la pynneh ïa ka jingïadei kaba jan bad ka Moscow wat hapdeng ka jingshah thombor, kaba la pynpait ïa ka jingïadei bad kiba bun kiwei pat ki nongïalam jong ka EU, bad uba la shah kynnoh ba u la pynmih ïa ka jingsngew pyrshah ïa ka Ukraine ha ka por ba la pynkhreh ïa ka elekshon ha ka sngi U Blei.
“Uba la iarap bha u dei u Viktor, namar u Viktor u dei uba la pynshlur ia ngi ban sngewthuh shisha ia kane, ban sngewthuh na ka jingpeit jong baroh arngut ki nong Ukraine bad ki nong Russia ia kaei kaba donkam ia ki ban pynkut noh ia ka jingialeh,” u la ong.
U Vance, ula sdang ïa ka jingleit jngoh jongu sha Hungary, ha ka sngi thohdieng, na ka bynta ban kyrshan ïa u Orban, uba ïakynduh ïa ka jingeh kaba khlem pat ju jia mynno mynno, ha ka jingsynshar jongu, kaba 16 snem, ha ka elekshon parliament ha ka Sngi U Blei.
