New Delhi, Iaiong:
U symbud nongmihkhmat jong ka Iran sha India, u Dr.Mohammad Hossein Ziyaeenia, haba iakren bad ki lad pathai khubor, u la ong ba ka jingsangeh thma hapdeng ka Iran bad US-Israel ka shong ha ki nongpyniaid ba ar jingmut. Shuh shuh ruh u la ong ba ki ri na ka thaiñ West, ki dei kiba shu leh myn leh sngewthuh bad sngewlem halor ka jingkhlad bad jingduh ei ia ki mynsiem briew, hynrei ka jingshisha ka long ba ki pyrkhat ia ka khaïi- pateng bad ka jingiohnong bad jingduhnong.
Haba ai jingkren sha ka NDTV, u Ziyaeenia u la ong ba ki heh ka Iran ki la dep iakraen halor ki mat iakren ban pyntreikam ia ka jingsangeh iasiat bad ba ka US ka la kohnguh bad sngap ia ki mat ba la buh da ka Iran haba iadei bad ka jingsangeh thma. U la ong ruh ba kane ka jingkohnguh jong ka US ka pyni ia ka bor bad ka jingstad jong ka Iran, hynrei kine ki 2 taiew ki ban wan, kin long kiba kham jynjar bad kiba kham kulmar.
Hynrei u la ong ba kane ka jingsangeh thma ka dei ban long kaba tikna, bad ba ka Iran ka ngeit skhem ha ki nongialam jongka, naba ki tip ba ki nongialam ka ri kin leh ia kaba bha tam.
Na ka liang ka US, ka la pynbna ba ka Iran ka la kohnguh ban sangeh iasiat kumba 2 taiew thik bad ka ban kynthup ruh ia ka jingplie bad jingpyntreikam noh ia ka lynti ïaid jhad ka ‘Strait of Hormuz’, naka bynta ki kam ki jam ba la sah teng baroh shi katta.
U la ong ba ka Iran ka ioh ia ka jingkyrshan paidbah bad ka jingpyrshah jong ka ri, bad ka jaitbynriew Islam ka la pyni ia ka jingiatylli bad ka jinglah ban ialeh pyrshah ha ka por jong ka thma ba la sdang da ka US bad ka Israel. Katkum ka jingong jong u, ka jingkyrshan paidbah ka la pynskhem ïa ka nongrim ïakren jong ka Tehran.
Ka Ziyaeenia ka la pynkynmaw ïa ki jingkren ba la kynnoh ba u nongïalam ba ha khlieh duh u Ayatollah Ali Khamenei u la kren kumba 40 sngi mynshwa ba katba ki nongshun jong ka Iran ki lah ban sdang ïa ka thma, hynrei ka Iran kan rai kumno kan kut noh.
U la ong ba ia ki jinglong jingman jong ka Iran mynta na ka bynta ka jingsuk la pynpaw shai bad kin ieng haduh ban da peit bniah bad pynthikna da ka UN bad kiwei kiwei ki seng pyrthei. “Lada ïa kine ki jinglong la bud bad pynthikna, ngi kyrmen ba ngin sa ïoh ïa ka jingsuk kaba neh ha baroh kawei ka thaiñ,” u la bynrap.
U Ziyaeenia u la kynthoh jur ïa ka jingkynthoh jong ki ri ka pyrthei khamtam eh halor ka lynti ïaid lieng kaba kongsan bha ha ka duriaw Hormuz. U la ong ba u “lyngngoh” ba ka jingsngewkhia jong ka pyrthei ka long halor ka lynti um kaba kongsan ban ia ka jingshah pyniap jong ki riew paidbah.
