Jerusalem, Iaiong:
U Myntri Rangbahduh ka Israel, u Benjamin Netanyahu, u la kren shai ba kan nym don ka jingsangeh thma bad ka Lebanon bad u la smai ruh ba un pynjot beit noh thiaw ia ka Hezbollah, ka kynhun lehnoh ba shyrkhei jong katei ka ri ba marjan.
U Netanyahu u la pynpaw shuh shuh ba u la bthah ïa ka kynhun myntri ban plie ïa ka jingïakren beit beit bad ka sorkar Lebanon ban pynurlong ïa ka “jingpynduh tiar ïaleh jong ka Hezbollah” bad “ka jingïateh kular jingsuk ba pawnam”.
“Hadien ka jingkyrpad ba bunsien na ka sorkar Lebanon, hynnin ka miet nga la bthah ïa ka kynhun myntri ban sdang ïa ka jingïakren beit beit bad ka Lebanon ban pynurlong ïa ki ar tylli ki thong. Nyngkong, ka jingpynduh tiar ïaleh jong ka Hezbollah. Kaba ar, ka jingïateh kular ïasuk kaba don histori hapdeng ka Israel bad ka Lebanon,” u la ong.
Ki shipai iada ri jong ka Israel ki la sdang ia ka jinghiar thma kaba thymmai ha ki jaka pynher tiar jong ka Hezbollah.”Ka IDF ka la sdang ban hiar thma ia ki jaka pynher tiar jong ka seng lehnoh Hezbollah ha Lebanon,” la ong ka IDF ha ka kyrwoh hapoh ka rynsan X.
Shwa ia kane, u Netanyahu u la bthah ia ki heh sorkar ban plie ia ka jingiakren beit beit bad ka Lebanon na ka bynta ban weng ia ki tiar ialeh jong ka Hezbollah bad ban pynlong ia ka jingsuk.
Katkum ka kyrwoh ba la sam da ka ophis jong u Myntri Rangbahduh halor ka X, u Netanyahu u la ong ba kane ka rai ka long hadien ka jingkyrpad ba bunsien na ka Lebanon ban sdang ïa ka jingïakren bad ka Israel hapdeng ka jingbteng jong ka jinghiar thma jong ki shipai Israel ïa kane ka ri.
