Mumbai, ïaïong:
Ka la don ka jingkhmih lynti ba ki 8 ngut ki MP jong ka Shiv Sena (UBT) Lok Sabha ki la pynlong ïa ka jingïalang kaba rieh bad u Symbud Myntri Rangbah ka Maharashtra u Eknath Shinde ban ïakren halor ka ‘Operation Tiger’.
Ki tyllong khubor na ka Shiv Sena, ki la kam ba u Shinde, u pyrshang ban wanrah ïa ki MP ka Shiv Sena (UBT) sha ka liang jong u, ban pynskhem ïa ka kyrdan jong u, ha ka Supreme Court, ha kaba ka jingïakajia halor ka kyrteng bad ka shap jong ka seng Shiv Sena, ka dang shong bishar.
“U Shinde u kwah ban pyni ha ïingbishar ba ka Sena jong u ka dei ka Sena ba shisha bad ba u don ïa ka jingbun paid jong ki MP Lok Sabha ryngkat bad ki MLA. Kumta la sdang ïa kane ka Operation Tiger. Kumno bad mynno dei ban pyntreikam ïa kane ka jingtreikam,” la ong ka tyllong khubor kaba khlem kwah ban pynpaw kyrteng.
Ka tyllong khubor ka la bynrap ba ki jingïakren bad ki MP jong ka Shiv Sena (UBT) ki la long lyngba ka online bad offline. “Lada ka Operation Tiger ka jop, u Shinde un mih kum u paralok ba kongsan jong ka BJP ha Delhi bad ha Maharashtra. Kane kan pynskhem ruh ïa ka kyrdan jong ka BJP ha Lok Sabha”, la ong ka tyllong khubor.
