Shillong, Iaïong 12
U Bah Ardent Millar Basawïamoit, President ka Voice of the People Party (VPP) ha ka sngi u Blei u la leit ban ai ka jingkyrshan ïa u Bah HB.Nonglang, Chairman ka Green-tech Foun-dation (GTF) uba la shong shah thngan ha madan Malki halor ka jingdawa na ka Sorkar ban wengnoh ïa ka project ha dewlynnong Lumpongdeng.
Haba kren sha ki lad pathai khubor u Bah Ardent u la kren da kaba shai sha ka Sorkar da kaba ong “Kane kam dei tang ka jingïaleh jong ki Samla ka kynhun GTF bad kaba phi kheiñ poh, hynrei kum ka party ruh ka ïengskhem ban kyrshan. Lada ka Sorkar ka dangsngap mynthi halor kane ka jingdawa, ngin sa shimbynta lang ruh ban shah thngan lang bad ka GTF, ym tang ban wan ai ka jingkyrshan”.
U la ong “Ngi ïohi ba kane ka Sorkar ba mynta ym dei tang ïa ka mariang kaba don ha Lumpongdeng, kum ka party ngi la thoh ka shithi haba ïadei bad ka byrni hat ba ki thmu ban knih noh ïa ka jaka bad wanrah ïa kita ki karkhana, hynrei ngi ïohi ba ka Sorkar ka thmu beit tang ban lilam ïa ki jaka,”
Da kaba kyntu ïa ki nongshong shnong ka Jylla ba kim dei ban shim sting halor kane ka jingïakhih ka kynhun GTF namar kane ruh kam don jingïapher halor ka jingïakhih ïa ka Reservation Policy.
“Lada ngim pat sngewthuh ïa ka jingkordor ka mariang, kan sa poi ka por ba ngin ïam, ngin ïam ban ïoh ïa ka um ban dih bad ngin ïam ban ïoh ka lyer ban ring mynsiem,” la ong u Bah Ardent.
U Bah Ardent u la ong ruh ba kane ka Sorkar ka ju len na ka por sha ka por bad ïa kane ka Sorkar MDA ka la ïahap ban ong ka ‘Meghalaya Denial Alliance’.
U Bah Ardent u la pynpaw ïa ka jingsngewkhia namar kane ka mat kadei kaba kum ka party ka ladep ban ïakren ha ki rynsan bapher-bapher kynthup haduh ha Iingdornar Thawaiñ bad kumjuh ban ai da ka jingthoh naduh u snem 2024, kaba ka Sorkar Jylla kam treh ruh ban ïakynduh ban ïakren.
“Kam da donkam ïa ka Sorkar ban wanrah ïa ki projek kiba heh ha ka liang ka Tourism namar ka Jylla Meghalaya ka dei ka ri kaba dap da ki jingkyrkhu ha kiba bun ki liang kaba donkam ka dei tang ban pynbha bad pynitynnad ïa ki kaba kan pynsngew tynnad ïa ki nongjngohkai pyrthei ban peit ïa ka mei mariang, hynrei ka jingwan rah ïa kine ki projek kadei hi ban pynmyntoi ïa ki briew kiba nabar bad ka jingwanrah ïa kita ki Spa, ki Casino ka dei beit ban pynjot ïa ki khun samla bad ki paidbah,” u la bynrap.
Shuh shuh u la ong, ka don ka jingma kaba khraw namar ka lah ban poi ba ha ka wei ka sngi, kine ki nongsynshar kin pynkylla ïa ka Shillong kum ka Sex City bad kumjuh ïa ka Jylla Meghalaya kum ka Sex State kaba ngim lah ban pdiang da lei-lei.
Kum ban shu kdew ba ka jingïakhih jong ka Green-Tech Foundation ka la sdang naduh ka 8 tarik Ïaïong bad ka jingshah thngan ka la sdang naduh ka 9 tarik u Ïaïong 2026, kata tang mar ïa mih na Sadar Police Station bad ka jingïakhih ka dei kum jingdawa ban pynbor ïa ka Sorkar Jylla ban weng noh ïa ka jingthmu ban shna ïa ki jingtei ha dewlynnong Lumpongdong.
Nalor u President ka VPP, u Bah Ardent Miller Basaiawmoit ha kane ka sngi la wan lang ruh u MDC ka Nongkrem, u Bah Kitborlang Syiem bad kiwei-kiwei de.
