Shillong, Ïaïong 12
Ka shlem treikam u District Sports Officer (DSO) East Khasi Hills ka la pynlong ïa ka prokram ai jinghikai kaba ar sngi na ka bynta ki coach ha ka jingïalehkai phutbol ha ka 10 bad 11 tarik mynta u bnai ha Mawkynrew.
Ha kane ka prokram la wan shim bynta da kumba 30 ngut ki coach kiba la don lypa ha ki kper sara ne ki grassroot centre kiba hap hapoh ka Mawkynrew C&RD Block bad la wan ban ai jinghikai da u coach ka tnat ïalehkai ka Sorkar Jylla u Bah Khlaiñ Pyrkhat Syiemlieh (AFC A Licence), ha kaba la ïadon lang u MLA ka thaiñ u Bah Banteidor Lyngdoh ha ryng -kat u DSO Bah O.B Mawthoh bad kiwei kiwei.
Haba ïakren bad u nongthoh khubor u Bah Banteidor u la ong ba kane ka prokram ai jinghikai ka long kaba biang eh na ka bynta ki coach khnang ba ki lah ban ïasam lem ïa ki buit ïalehkai sha ki khynnah kiba don ha ki kper sara jong ka thaiñ.
“Ka thaiñ Mawkynrew ka la mih bun ki nongïalehkai phutbol kiba la mihkhmat ïa ka thaiñ bad ïa ki klob bapher bapher jong ka nongbah Shillong lem bad ki rephri, hynrei ngi donkam pat ïa ki coach ki ban don ïa ki license khnang ki lah ban saiñdur ïa ki sap ïalehkai jong ki khynnah kiba dangdon hapoh ki kper sara jong ka thaiñ,” u la bynrap.
