Shillong, Ïaïong 12
Haduh 16 ngut ki briew ba don bynta ha ka kam pynïaid ïa ki kam awria kynthup ki ‘thei die met ki la shah rah noh ha ki pulit ka East Khasi Hills ha ka jingkhynra kaba la pynlong ha ka miet jong ka sngi Saitjaiñ ha Shillong.
Ïa kane ka jingkhynra la pynlong ha ka por 11:30 mynmiet ha ki thaiñ Police Bazaar, Presbyterian Church (Police Bazaar), IGP Point bad kiwei ki jaka ba marjan bad la ïalam ïa ka da u Additional SP Traffic Lovish Garg, IPS bad u SDPO ka Pynursla Bah B Wanswet MPS nalor kiwei ki ophisar, ki jaka na kaba ki pulit ki la ju ïoh ka jingujor na ki riew paidbah kaba la pynthut bad pynwit ruh ïa ka leit ka wan.
Ha ka kyrwoh khubor ba la pyllait, u Superinten-dent of Police ka East Khasi Hills District Bah Vivek Syiem, u pyntip ba ki pulit kila ïoh pdiang ïa ka jingujor ba man ka por na ki riew paidbah halor ki kam jakhlia, ka jingïa tyrwa leh kam awria bad ka jingpynthut ïa ki paidbah da ki ‘thei die met.
U SP u la ïathuh ba ha ka jingkhynra la ïohi ïa ki ‘thei die met kiba ïaid tyrwa ïalade sha ki nongïaid nongïeng, pyni dak ban leh kam awria bad pyrshang ban khring ïa ki shynrang, kaba pynisaidmet, pynthut ïa ki riew paidbah bad ktah ruh ïa ka jinglong kyntang jong ki jaka leh niam ba marjan bad ki jaka paidbah ba kongsan.
Shuh shuh na ka liang jong u SP u la pyntip ba ïa kine ki 16 ngut la rah noh sha thanad da ka kynhun bad la register case ïa ki hapoh ka kyndon 110 jong ka Meghalaya Police Act.
Lah ruh ban pynkynmaw ba dang ha ka taïew ba khatduh jong u bnai ba la lah, ki pulit haba pynlong ïa ka jingkhynra ha ki bynta jong ka Shillong, ki la rah ïa ki 16 ngut ba kynthup ïa 4 ngut ki pimp ne agent (ki briew kiba ïapynbeit bad ki nongleh kam awria).
