Dehradun, ïaïong:
Ha ka jingkhynra kaba jur bha ban ïakhun pyrshah ïa ki kam lehnoh, ka Uttarakhand Special Task Force (STF) ka la kem ïa uwei u samla ba 29 snem ka rta, u Vikrant Kashyap, halor ka jingkynnoh ba u la donkti ha ki kam pyrshah ri bad ba u la thmu ban seng ïa ka kynhun lehnoh ‘Tehreek-e-Taliban Hindustan’ (TTH) ha ka jylla.
Kane ka jingkem ka long hadien ka jingbuddien kaba jur bad ka jinglum jingtip kaba la bun taïew. U Senior Superintendent of Police (SSP), ka STF, u Ajay Singh, u la pynpaw ba katei ka tnat ka la buddien ïa ki jingtip kiba ïadei bad ki samla kiba la shah pynrung kam ha ki pulit wad bniah jong ka Pakistan lyngba ki lad pathai khubor.
“Ngi la don ki jingtip ba ki seng lehnoh ki thmu ïa ki samla kiba rit paid lyngba ka Instagram bad kiwei kiwei ki lad pathai khubor, da kaba pynkhreh ïa ki ban trei kum ki jaka thiah ban buh jingma ïa ka jinglong trai bad ka jinglong ba janai jong ka India,” ong u SSP ha ka jingïakren bad ki nongthoh khubor.
Kat kum ka jingong ki pulit, une uba shah kynnoh, u dei uba shong ba sah ha ka thaiñ Jhajhra ha Premnagar, uba la shah pyndik ha ki nongkhaïi kiba na Pakistan, kiba la tip kyrpang kum u Shahzad Bhatti bad uwei u paralok ba la tip kum u ‘Rana’.
Ha ka jingtohkit, la lap ba u Kashyap, uba dei u nongkyrshan jong u nongrwai Punjabi uba la khlad noh, u Sidhu Moosewala, u la sngewsih jur halor katei ka jingshah pynïap jong une u nongrwai.
Da kaba pyndonkam ïa kane ka jinglong rit mynsiem, ki nongpynïaid na Pakistan ki la ïasam ïa ki Reels bad ki jingthoh kiba pynkhihwin, ha kaba khatduh ki la pynlong ïa u ban ïakynduh beit beit lyngba ka WhatsApp bad Instagram.
Ki nongpynïaid ki pyndonkam bakla ïa u samla, da kaba ai kam ïa u ban pynmih ïa ka jinglong jingman jong ka jingtieng. La bthah ïa u Kashyap ban pynlong ïa ka jingwad bniah ïa ki jaka ba donkam ha Dehradun, kynthup ïa ka Inter-State Bus Terminal (ISBT), ka Police Headquarter bad kiwei kiwei ki jaka ba kongsan jong ka sorkar.
U nongshah kynnoh u la kam ba ki nongpynïaid jong u ki la pynbor ïa u ban ring dur ïa kine ki jaka ba don ka jingpahara kaba jur, da kaba kular ba uwei u briew uba kyrteng u ‘Gujjar’ un pynbiang ïa u ïa ki tiar ïasiat, ki tiar pynbthei bad ka pisa.
“Ka jingthmu jong ki nongpynïaid ka long ban pynrung ïa ka jingtieng bad ban pynpaw pyrthei ïa ka kyrteng jong ka kynhun jong ki, (TTH),” la kdew uwei u heh jong ka STF. Hadien kine ki jingbthah, u Kashyap u la synreit rong ‘TTH’ ha ki jaka paidbah bapher bapher, kynthup hajan ka Subharti Hospital, Advani Pul bad ha Balaji Mandir ha Jhajhra. La ïathuh ba u la phah biang ïa ki dur khih jong kine ki kam, ryngkat bad ki dur wad bniah jong ka jaka sah jong ki pulit ha Jhajhra, sha ki nongpynïaid jong u ha Pakistan.
Ki nongtohkit ki la ithuh ruh ïa ka buit ban thombor ïa ki nongïaleh pyrshah bad ïa u nongïasaid aiñ jong ka Supreme Court ha Delhi da kaba pyndonkam da u bom kti. Ki nongpynïaid ki la kular ban pynsuk ïa ka jingphetwir jong u sha Dubai lyngba ka Nepal, da kaba ai khusnam pisa na ka bynta ka jingïatreilang jong u.
Ki STF ki la kem ïa u Kashyap bad ki la kurup ïa kawei ka suloi .32 bore, hynñiew tylli ki kuli bym pat pyntreikam, kawei ka tin synreit rong bad kawei ka mobile phone kaba don ïa ki sakhi sabut. Utei u nongshah kynnoh, uba la trei mynshwa ha Nabha, Punjab bad mynta u dang shah tohkit.
“Kane ka dei ka jingtohkit kaba kongsan. Ngi dang ïatreilang bad ki tnad pdeng ban wad ïa ka kynhun kaba don shadien jong kine ki kam bad ban sei madan ïa ka jingheh jingrit ba pura jong ka jingthmu sniew,” la bynrap biang u SSP Singh.
Ïa kane ka jingkhynra kaba jop la ïalam da ki Inspector kiba kynthup ïa u Abul Kalam, N.K. Bhatt bad u Yadavinder Bajwa, ryngkat ka kynhun jong ka STF kaba aiti lut.
