Shillong, ïaïong 12
Ka Kong Bindas Syiem ka Longkmie ba na Ri-Bhoi District ha ka sngi u Blei ka la wan ban ai jingkyrshan ïa ka jingïakhih jong ka Green-Tech Foundation ban pynbor ïa ka Sorka Jylla ban weng noh ïa ka jingthmu bna tei ïa ki jingshna ha u Dewlynnong Lumpongdeng.
Haba kren sha ki nongthoh khubor ka Kong Bindas ka la pynpaw ba ka don ka jingkitkhlieh ïa ka pateng ki khun ki ksiew ki ban wan, ba ma ki ruh kin ïoh ïa ka hok ban ring mynsiem ïa ka lyer kaba khuid, kumba u Blei u la ai ïa ka mei Mariang kaba itynnad.
Ka la kyrpad ïa ka Sorkar ban sngew ban sngap ïa ka jingdawa jong ka GTF khang ba kin sangeh noh ka jingïakhih bad ka la ong ba lada ka Sorkar ka leh kyllud haba ïadei kane ka mat, ki longkmie na them Ri-Bhoi kin mih sha madan ban ïakhih bad ban ai jingkyrshan ïa ka jingïakhih jong ka seng.
Ka la kyntu ruh ïa ki paidbah ka them Ri-Bhoi ba ki dei ban sngewthuh bad ban wan ban ai ka jingkyrshan ïa kane ka jingïakhih jong ka GTF, da kaba kdew ba kane ka mat ka dei ka ba ktah ïa ka them Ri-Bhoi.
