Shillong, Ïaïong 13
Ka Sputnik CC ka long ka lahduh ha ka P.A.Sangma Memorial T20 Cricket Tournament 2026 ba la pynlong da ka Shillong Cricket Association, hadien ba ka la pynliem noh ïa ka Royal CC da 38 run ha ka jingïakhun final kaba la long ha ka lah sngi U Blei.
Ha kane ka jingïakhun kaba la long ha madan Polo, ka Royal kaba la jop ïa ka kynting pisa ka la ailad ïa ka Sputnik ban tied nyngkong ha kaba ka la kamai 164 run bad shah pynhap 8 wiket ha ki 20 over. U Gurinder Singh u la long u rangïalehkai ba kynsai da kaba u la khyrwit ïa ka shiteng spah kaba 64 run na ki 37 bol bad u Amingshu u la ïoh 26 run na ki 22 bol. Katba u Bipin Ray bad u Dippu Sangma ki la khur mar 2 wiket na ka bynta ka Royal.
Ka Royal kaba la wan shimti ïa ka pali kaba ar kam shym la lah ban kynjoh sha ka thong ha kaba ka la kamai tang 126 run hadien ba ka la shah pynkhyllem baroh ki nongtied ha ki 18 over. U Raj Biswa u la tied 31 run na ki 14 bol. Katba u Gurinder Singh bad u Nafees Siddiqui ki la khur mar 2 wiket na ka bynta ka Sputnik.
Ïa ka nam Player of the Match la khur da u Gurinder Singh ba la tied 64 run bad khur 2 wiket. Katba ïa ka nam Player of the Tournament la ïoh da u Swarajeet Das, uba la kamai 298 run ha ki phra tylli ki jingïakhun lem bad 10 wiket ha ki khyndai sien ïakhun.
