Shillong, Ïaïong 13
Ka Meghalaya Football Association (MFA) ka la pyllait ïa ki prokram ïalehkai na ka bynta ki jingïalehkai group jong ka 5th Meghalaya State League (MSL 5) ki ban long ha kylleng ki district ka Jylla, ïa kaba yn sdang naduh 15 tarik mynta u bnai.
Ki don haduh 33 ki kynhun ki ban ïashim bynta ha ki phra tylli ki group, ha kaba kin don haduh 104 tylli ki jingïalehkai mynta u snem, kaba long kaba heh duh kane ka lympung ïalehkai MSL .
Ka Mawlai SC kaba long ka lahduh jong ki ar snem ba la lah, ka la don ha ka Group-C ha kaba kan pynkhreh ïa ki jingïakhun ha Amlarem. Katba ka jingïalehkai kaba nyngkong jong kane ka lympung kan long ka Nongkseh SSCC bad ka Khimusniang SC ha SSA Stadium ha Polo bad ïa kane ka jingïalehkai yn pynlong ha ka por 5 baje janmiet. Katba kiwei pat ki jingïalehkai jong kiwei pat ki group yn pynlong ha ka por 3 baje nohphai sngi.
Manla kawei pa kawei ka kynhun kan hap ban ïakhun pyrshah ha ki ar tylli ki wat jingïakhun (two leg), ha kaba ki ar tylli ki kynhun ki ban wan ha ki kyrdan ba hakhlieh kin ïoh rung sha ka pre-quarter final, kaba long ha u Jymmang.
Ban wanrah ïa ka jingïalehkai kaba kham itynnad shuh shuh ïa kane ka lympung, ki bor pynïaid ka MFA ki la nangpynïar sa ar tylli kiwei pat ki jaka ïalehkai kiba thymmai mynta u snem kata ha Williamnagar bad Amlarem. Ha kaba la bynrap ruh ba ka Mairang kan ïoh ban pynlong biang ïa kane ka lympung hadien ba ka la ïoh ban pynlong ïa ki jingïalehkai MSL 4.
Ïa kane ka lympung ïalehkai MSL, ka MFA ka la ïoh jingkyrshan na ka tnat ïalehkai jong ka Sorkar Jylla, naduh ba ka la pynlong nyngkong eh ha u snem 2017. Kane ka lympung ka long shi bynta ban wanrah ïa ki kynhun kiba kynsai na baroh ki synjuk ïalehkai kiba la pynïasoh sha ka MFA bad ban ïaknieh ïa ka nam lahduh. Kumba ka paw kane ka lympung mynta u snem ka long kaba kham kyrpang namar ka MFA ka rakhe ruh ïa ka Golden Jubilee.
Ïa ki prokram ïalehkai ba pura jong baroh ki group ha kane ka lympung lah ban peit na ka https://www.facebook.com/share/p/17NQeFrkE1/
